Хөдөөгийн сэргэлт чуулган амжилттай боллоо

Өнөөдөр Соёлын төв өргөө, Дуурь бүжгийн эрдмийн театрт “Хөдөөгийн сэргэлт” чуулган боллоо. Энэ чуулганд Монгол Улсын Ерөнхий сайд Л.Оюун-Эрдэнэ, Шадар сайд бөгөөд Эдийн засаг, хөгжлийн сайд Ч.Хүрэлбаатар, Засгийн газрын Хэрэг эрхлэх газрын дарга Д.Амарбаясгалан, Сангийн сайд Б.Жавхлан, Нэгдсэн Үндэсний Байгууллагын Шилжилт хөдөлгөөний байгууллагын мэргэжилтнүүд, 21 аймгийн удирдлагууд оролцов. 

Чуулганы үеэр Засгийн газраас хөдөөгийн хөгжлийг дэмжиж хэрэгжүүлж байгаа төсөл хөтөлбөрүүдээ танилцуулж мэдээлэл өгсөн юм.  Тодруулбал, хөдөө орон нутагт шилжин очиж байгаа иргэдийн ипотекийн зээлийн 3 хувийг төрөөс дааж, урьдчилгаа төлбөрийг 60 хүртэл хувийг Зээлийн батлан даалтын сангаас хариуцана. 

Мөн хөдөө орон нутагт шилжин ажиллах аж ахуйн  нэгжүүдэд 1 хувийн хүүтэй, 500 хүртэл сая төгрөгийн зээл олгох юм байна. Нийт 1600 орчим хүн оролцсон энэ чуулганы бүртгэлийг цахимаар явуулсан бөгөөд хөдөө орон нутагт ажиллаж, амьдрах сонирхолтой иргэд чуулганы үйл ажиллагаанд идэвхитэй оролцож байлаа. 

Түүнчлэн  хөдөө орон нутагт шилжин суурьшсан залуучууд чуулганд хүрэлцэн ирж өөрсдийнхөө туршлагаас хуваалцсан юм. Засгийн газрын хөдөөгийн сэргэлтийг “Оюутолгой” , “АПУ дейри” зэрэг үндэсний 30 гаруй томоохон компани дэмжиж байгаагаа илэрхийлж, ажлын байр шинээр бий болгоход хамтран ажиллах боломжтой гэдгээ илэрхийлжээ. Чуулганы үеэр оролцогчдоос ирүүлсэн санал хүсэлтүүдийг нэгтгэн Засгийн газар, УИХ-д танилцуулах бөгөөд эдгээр санал санаалчлагыг ажил хэрэг болгож, хөдөөг хөгжүүлэхэд анхаарч ажиллана  гэдгээ Ерөнхий сайд мэдэгдсэн байна.

Б.Нүүдэл