ВИДЕО: Хөгжлийн банкны зээлийн асуудлаарх нээлттэй сонсголд Ц.Элбэгдорж ирсэнгүй

Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцыг хянан шалгах Түр хорооноос нотлох баримтыг шинжлэн судлах гурав дахь ээлжит сонсгол болж байна. 

Хянан шалгах түр хорооны даргаар Улсын Их Хурлын гишүүн Б.Энхбаяр томилогдон 12 гишүүний бүрэлдэхүүнтэйгээр үйл ажиллагаагаа явуулж байгаа билээ. Хурлын дарга Б.Энхбаяр экс ерөнхийлөгч Ц.Элбэгдорж сонсголд ирээгүйд "Холбогдох эрх бүхий хүмүүс нь бүгд ирээгүй байна. Гутлаа тослоод, зангиагаа зүүгээд ирдэг гэсэн ирсэнгүй дээ" хэмээн ёжлов.

Өнөөдрийн сонсголоор АСЕМ вилла төсөл, АСЕМ зочид буудал, Мах хөтөлбөр 2016 он, Тайж группын зээлтэй холбоотой багц асуудлуудаар дуудагдсан 68 гэрчээс асуулт асууж, холбогдох нотлох баримтуудыг шинжлэн судлах ба Хянан шалгах түр хорооноос томилогдсон хянан шалгагч, шинжээч нарын дүгнэлтийг сонсох юм.  Нотлох баримтыг шинжлэн судлах сонсголын гурав дахь шатанд 240 гаруй иргэн, хуулийн этгээдийг гэрчээр дууджээ.

Хурал даргалагч УИХ-ын гишүүн Б.Энхбаяр: 

-Төрд төлөөлж шийдвэр гаргаж байсан Ц.Элбэгдорж ирээгүй байна. Тэгэхээр тухайн үед Сангийн сайдаар ажиллаж байсан С.Баярцогтоос асууя.

АСЕМ дээд хэмжээний уулзалт Монгол Улсад амжилттай зохион байгуулагдсан. Өнөөдрийн хуралдаанд улс төрийн бусад үр дүн, ач холбогдлын талаар хэлэлцэхгүй. Зөвхөн уг арга хэмжээг зохион байгуулахтай холбоотой Хөгжлийн банкнаас гарсан санхүүжилтийн талаар хэлэлцэнэ. Хөгжлийн банкны хөрөнгөөр бонд гаргаж санхүүжүүлье, түүн дундаа бондын 4 хувийн хүүтэй ХХБ-нд үнэт цаас гаргаж зохион байгуулах шийдвэрийг ҮАБЗ-өөс гаргаж байв. Уг нь Ц.Элбэгдорж ерөнхийлөгч аснаас л үүнийг асуумаар байна. Тиймээс энэхүү шийдвэр хэрхэн гарсан бэ гэдгийг танаас асуумаар байн

Сангийн сайд асан С.Баярцогт: Би 8 жилийн өмнөх зүйлийг ярихын тулд 14 жилийн өмнө болсон үйл явдалтай холбогдуулж хариулт хэлж байна. Гүний уурхайн ажил нь жигдрээд бүтээгдэхүүнээ гаргаж байгаа анхны өдөр бол өнөөдөр. Иймээс ОТ-н гэрээ байгуулсан хүмүүст, монголчууддаа чин сэтгэлийн халуун баяр хүргэе.

АСЕМ бол Ази Европын дээд хэмжээний уулзалт бөгөөд Европын 30, Азийн 21, Олон улсын хоёр байгууллага оролцсон маш том нээлттэй платформ. Монгол Улс 2008 онд элсэн орсон ба 12 жилийн дараа Монголд зохион байгуулах завшаан олдсон. Үүнийг Улс төрийн олимп ч гэж нэрлэдэг, тиймээс тооцоо судалгаатай санхүүжүүлэхгүй бол зохион байгуулагчид ашиг гарахгүй тохиолдол гардаг.  2014 оны 12-р сарын 30-нд Ерөнхийлөгчийн зарлигаар АСЕМ-ийн 16-р дээд хэмжээний уулзалт, 20 жилийн ойг 2016 онд Монголд хийх шийдвэрийг гаргасан. Зохион байгуулах ажлын хэсгийг Ерөнхий сайд ахалж ажилласан.

АСЕМ-тай холбогдуулж Монгол Улсын нийгэм эдийн засгийг хөгжүүлэх үндсэн зорилтод 21.1.4-т АСЕМ-ийг 2016 онд УБ-т зохион байгуулах шийдвэрийг гаргаж УИХ-д хэлэлцсэн. АСЕМ зохион байгуулахаар Монгол Улсын 2016 оны төсвөөс 50 тэрбум төгрөг зарцуулах шийдвэрийг УИХ-аас гаргасан.

Нээлттэй сонсгол үргэлжилж байна