Багш нарын ажлын бүтээмжийг үнэлж, 10-25 хувийн урамшуулал олгоно

Багшийн ажлын гүйцэтгэл, үр дүнг тодорхойлох үнэлгээг энэ сарын 15-16-ны өдөр улс орон даяар нэгэн зэрэг зохион байгуулж буй талаар БШУЯ-ны Боловсролын үнэлгээний төвийн дарга Л.Ганбат мэдээллээ.

Энэхүү гүйцэтгэлийн үнэлгээнд төрийн болон төрийн бус өмчийн 705 сургуулийн 30077 багшийг хамруулах бөгөөд тэднийг дөрвөн шалгуур, 13 үзүүлэлтээр дүгнэх юм байна. Ингэхдээ өөрийн болон хөндлөнгийн үнэлгээний арга ашигладаг гэдгийг тус төвийн дарга Л.Ганбат онцоллоо. Тодруулбал, тухайн багшийн ажлын гүйцэтгэл үр дүнг багш өөрөө, хамт олон, суралцагч, эцэг эх, заах аргын нэгдлийн ахлагч, нийгмийн ажилтан, сургалтын менежер, захирал үнэлдэг. Харин сургалтын байгууллагын гүйцэтгэлийг суралцагч, эцэг эх, хамт олон, харьяа боловсролын газар, хэлтэс үнэлдэг байна.

Үнэлгээний үр дүнг нийслэл, аймгийн төв, сум болон багийн төв гэсэн гурван байршилд судлагдахуун болгоноор индексийн зургаан түвшинд бүлэглэн тооцож, 10-25 хувийн урамшуулал олгодог аж. Өнгөрсөн жилийн тухайд нийт ерөнхий боловсролын сургуулийн багш нарын 43 орчим хувь нь 1-4 түвшинд хамрагдаж, өөрийн үндсэн цалин дээрээ нэмэлтээр 10-25 хувийн урамшууллыг авчээ.

Сургуулийн өмнөх болон ерөнхий боловсролын сургуулийн багшийн ажлын гүйцэтгэл, үр дүнг тодорхойлох энэхүү ажлыг хоёр дахь жилдээ зохион байгуулж буй гэдгийг БШУЯ-ны Боловсролын үнэлгээний төвийн дарга Л.Ганбат хэллээ. Тэрбээр “Сургуулийн өмнөх буюу цэцэрлэгийн багш нарын гүйцэтгэл, үр дүнг тодорхойлох ажлыг өнгөрсөн дөрөвдүгээр сард зохион байгуулсан. Харин энэ удаад ерөнхий боловсролын сургуулийн багш болон сургалтын байгууллагын гүйцэтгэлийн үнэлгээг хийж эхлээд байна. Энэхүү ажлыг сургууль, багшийн ажлын гүйцэтгэл, үр дүнд суурилан багшийн хөгжлийн хэрэгцээг тодорхойлох, урамшуулал, нэмэлт санхүүжилт олгох төсвийн шинэчлэлийн хүрээнд зохион байгуулж байгаа юм” хэмээв. 

С.Аз