Орон нутгийн нислэгийг сэргээж, үнэ тарифыг бууруулах ажил бодитоор хэрэгжиж эхэллээ

Засгийн газраас өнгөрсөн оны 11 дүгээр сараас эхлэн орон нутгийн хуваарьт нислэгүүдийг сэргээх, үнэ тарифыг бууруулж, өрсөлдөөнийг бий болгохоор ажиллаж эхэлсэн. Харин өнөөдөр энэ зорилт биелэж 15 жилийн дараа "МИАТ" ТӨХК орон нутгийн нислэгээ сэргээлээ. Эхний нислэг Ховд аймгаас ийнхүү эхэлж байна.

Баруунаас зүүн тийш 2392 км, хойноосоо урагш 1269 км газар нутагтай манай улсад орон нутгийн нислэг чухал. Аялал жуулчлалыг хөгжүүлэх, орон нутаг дахь иргэдийн урсгалыг нэмэгдүүлэх, цаг хугацаа хэмнэх, компаниудын өрсөлдөөн дунд үнэ тариф буурах гээд олон ач холбогдол бий. Тиймээс орон нутгийн найман чиглэлд долоо хоногт 1-3 удаагийн давтамжтайгаар "МИАТ" ТӨХК нислэг үйлдэж эхэллээ. Тэдгээр чиглэлүүдийн тийзний үнэ өмнөхөөсөө 2 - 2,5 дахин буураад байна.

"МИАТ" ТӨХК нь орон нутгийн нислэгийг хямд үйлдэж эхэлснээр агаарын тээврийн компаниудын өрсөлдөөн дунд иргэдэд сонголт үүснэ. Нөгөө талаас үнэ тариф 2 – 2,5 дахин буурсанаар ААН-үүд зах зээлийн давамгай байдлаараа дамжуулж үнэ өсгөдөг, зохиомол хомстол үүсгэдэг, зөвхөн захиалгат нислэг үйлддэг зэрэг асуудлууд арилна. Мөн ирэх 10-11 дүгээр сард орон нутгийн нислэгийн 75 хүний суудалтай онгоцыг хуурай түрээсийн зарчмаар ажиллуулснаар одоогийн үнэ улам буурах боломж бүрдэх юм.