Зарим байршилд авто замын хөдөлгөөнийг тодорхойгүй хугацаагаар хаана

Улаанбаатар хот орчимд 7 дугаар сарын 3-5-ны өдрүүд үргэлжлэн орсон борооны улмаас  Баянзүрх, Сүхбаатар, Сонгинохайрхан, Хан-Уул, Чингэлтэй дүүргүүдийн нутаг дэвсгэрт 54 орон сууц, 1 худалдааны төвийн граж /В1 давхар/, амины 5 байшин, 15 гэр, 2 автозам, 2 нүхэн гарц усанд автаж, хоёр далан, гүүр задарсан. Нийслэлийн Онцгой байдлын газар,  дүүргүүдийн Онцгой байдлын хэлтэс НЦУГ, Геодези усны барилга байгууламжийн газар, Ус суваг удирдах газар, дүүргүүдийн ЗДТГ, хороо, СӨХ, Тохижилт үйлчилгээний хэлтсийн  нийт 397 ажилтан, алба хаагч, 66 автомашинтайгаар  усыг соруулан шуудуу, далан татан ажиллаж байна. 

Засгийн газрын өнөөдрийн хуралдаанаар нийслэлд өндөржүүлсэн бэлэн байдал зарлаж, ажиллахыг Ерөнхий сайд үүрэг болгоод байгаа билээ. 

Үүнтэй холбогдуулан долоодугаар сарын 5-ны 00:00 цагаас эхлэн нөхцөл байдал сайжрах хүртэл тодорхойгүй хугацаагаар зарим авто зам, замын байгууламжийг хаах тухай захирамжийг Нийслэлийн Засаг дарга бөгөөд Улаанбаатар хотын Захирагч Д.Сумъяабазар гаргалаа.

Тодруулбал:

• Баянзүрх дүүргийн 25 дугаар хорооны “Натур” худалдааны төвөөс Нарны замын уулзвар хүртэлх;
• “Баянмонгол” хорооллын нүхэн гарцаас Хүннүгийн гудамж хүртэлх;
• Хан-Уул дүүргийн 3 дугаар хорооны Энхтайвны өргөн чөлөөний нүхэн гарцаас Нарны гүүрний уулзвар хүртэлх;
• Сүхбаатар дүүргийн 1 дүгээр хорооны Нийслэлийн өргөө амаржих газрын уулзварас Нарны замын уулзвар хүртэлх;
• Сэлбэ, Дунд гол дагуух авто замыг түр хугацаагаар хаах юм.