ДБЭТ-ын 60 жилийн ойн арга хэмжээ “Сонгодог Жаран” гала тоглолтоор эхэлнэ

ДБЭТ-ын хамт олон түүхт 60 жилийн ойн арга хэмжээ “Сонгодог Жаран” гала концертоор эхэлнэ. Уг тоглолт маргааш 20:00 цагаас Сүхбаатарын талбайд болохоороо онцлог юм. Театрын байшингаасаа гарч сонгодог урлагийг ард түмэндээ сонсгохоор шийдсэн тэд энэ талаараа хэвлэлийхэнд мэдээлэл өгсөн юм. Мэдээллийн эхэнд ДБЭТ-ын захирлын үүргийг түр орлон гүйцэтгэгч Б.Сарантуяа ярихдаа  “Монголын сонгодог урлагийн өргөө болсон ДБЭТ-ын хамт олон түүхт 60 жилийн ойтойгоо золгож байна. Анх 1963 оны тавдугаар сарын 10-нд Хөгжимт драмын театраас Улсын дуурь, бүжгийн театр өрх тусгаарлан, өндөр үүдээ нээсэн түүхтэй. ДБЭТ 1963 оны тавдугаар сарын 15-нд П.И.Чайковскийн “Евгений Онегин” дууриар бие даасан театрынхаа нээлтийг хийж, 60 жилийн түүхээ бичих замналаа нээсэн юм. Театр маань өнгөрсөн 60 жилийн хугацаанд 120 гаруй дэлхийн томоохон сонгодог бүтээлийг тайзнаа тоглосон байна. Театрынхаа тайзнаа өөрийнхөө залуу нас, авьяас билгийг зориулсан ахмад үеийнхэн болон дунд, залуу үеийнхэн нэгдэж, жаран жилийн түүхийг бичилцэж байна. Бид нэгэн жарны түүхийг агуулсан “Сонгодог жаран” хүндэтгэлийн тоглолтууд, түүхэн баримтат кино, сэтгүүл зэрэг томоохон арга хэмжээ  хийхээр төлөвлөсөн. Мөн ойн арга хэмжээгээ “Сонгодог жаран” гала концертоор эхлүүлэх гэж байна. Энэ тоглолтоороо театрын сор болсон томоохон уран бүтээлүүдийн дээжсээс үзэгчдэдээ нээлттэйгээр сонордуулах болно. Тоглолтод театрын дунд болон залуу үеийн уран бүтээлчид оролцохоор бэлтгэл хангасан” гэв. Нэгэн жарныг ардаа орхисон ДБЭТ-аас Хөдөлмөрийн баатар тав, Ардын жүжигчин 29, Гавьяат цолтон 93, Чингисийн одонт нэг, Ерөнхийлөгчийн нэрэмжит шагналтан дөрөв, Төрийн хошой шагналтан хоёр, Төрийн шагналтан 18 төрөн гарсан байх юм. Маргааш гала тоглолтоор эхлэх 60 жилийн ойн арга хэмжээний хаалт ирэх сарын 15-нд болно. Дууриас театраас төрсөн алдартнуудын нэг Ардын жүжигчин А.Долгор “Театрынхаа уран бүтээлчдэд түүхт 60 жилийн ойн баярын мэндийг хүргэе. Миний хувьд 1984 оноос хойш театртаа 28 жил ажилласан. Ингээд бодохоор 60 жилийн талыг нь хуваалцжээ. Би гоцлол дуучдын гурав дахь үеийн дуучин. Театр маань хүнд цаг үед ч үүд хаалгаа хааж байгаагүй. Үе үеийн нэрт уран бүтээлчдийг өлгийдөн авч, овоглосон ягаан театраараа үргэлж бахархаж явдаг. Монголын маань маш сайхан театрын нэг. Уран бүтээлч миний хувьд маш их баяртай байна. Одоо театр маань шинэ залуу мэргэжлийн уран бүтээлчдээр цусаа сэлбэж, эрч хүчтэйгээр ажиллаж байна. Цаашдын уран бүтээлд нь улам их амжилтыг хүсэн ерөөе” гэв.