Монголын сэтгүүлчдийн нэгдсэн эвлэл (МСНЭ)-ээс санаачлан зохион байгуулсан нийтлэл, нэвтрүүлгийн уралдаанд манай сонины Улс төр, эдийн засгийн албаны сэтгүүлч С.Юмсүрэн “Амьдрал бэлэглэгч хөтөлбөр” нийтлэлээрээ тэргүүн байр эзэлж өргөмжлөл, мөнгөн шагналын эзэн боллоо. Түүнчлэн “Малчин телевиз”-ийн “Эрүүл мэнд-Эрт илрүүлэг” мэдээний булан, Гэр бүлийн радиогийн эрт илрүүлэг хамтын цуврал бүтээл, Орхон аймгийн “Шинэ мэдээ” сонины сэтгүүлч Г.Хашбаатарын нийтлэлийг шилдгээр тодруулан шагнаж урамшуулжээ. Энэхүү нийтлэл, нэвтрүүлгийн уралдааныг хэвлэмэл ба цахим, телевиз радио, видео контент зэрэг төрлөөр эрт илрүүлэг, үзлэг оношилгоо сэдвийн хүрээнд зохион байгуулсан байна. Уралдаанд нийтдээ 100 гаруй нийтлэл, нэвтрүүлэг ирүүлсэн бөгөөд бүтээлүүдийг гурван байр эзлүүлж, тусгай байрт хоёр сэтгүүлчийн нийтлэлийг нэрлэжээ. Хүн амын дунд зонхилон тохиолдож буй халдварт болон халдварт бус өвчнөөс урьдчилан сэргийлэх, эрт илрүүлэг, үзлэг оношилгооны ач холбогдлыг олон нийтэд сурталчлан таниулах, иргэдийн эрүүл мэндийн боловсролыг дээшлүүлэхэд хувь нэмэр оруулах зорилгоор энэхүү уралдааныг зохион байгуулжээ.

Эх сурвалж: Монголын үнэн сонин №039/24570/