Боловсролын ялгааг арилгаж, хүртээмжийг нэмэгдүүлэхээр ажиллаж байна

Дүүргийн зүгээс боловсролын салбарт хийж, хэрэгжүүлж буй онцлох ажлуудыг хүргэж байна.

Монгол Улсад тэр дундаа Чингэлтэй дүүрэгт олон улсад хэрэгжиж буй төсөл хөтөлбөрийг хэрэгжүүлэн ажилласан нь үр дүнгээ өгч эхэлжээ. Дүүргийн сургуулийн өмнөх боловсролын байгууллагыг дэмжих, бага насны хүүхдийн танин мэдэхүй, бүтээлч сэтгэлгээг хөгжүүлэх чиглэлээр дүүргийн цэцэрлэгүүдийг олон улсын Монтессори, I’m break Steam хөтөлбөрт хамруулах ажлыг амжилттай хэрэгжүүлж байна.

Цахим сургуулийн тоог нэмэгдүүлэх зорилтын хүрээнд дүүргийн ерөнхий боловсролын сургууль, цэцэрлэгүүдэд 85.685.600 төгрөгийн үнэ бүхий 29 ширхэг компьютер, 13 ширхэг принтер, таван ширхэг нөөтбүүкийг нийт 14 цэцэрлэг, таван сургуульд хүлээлгэн өгчээ. Мөн ЕБС-ийн багш бүрийг компьютержуулах ажлыг үе шаттай эхлүүлж эхний ээлжид 400 багшид зөөврийн комьпютер хүлээлгэн өгөөд байна. 

Багш, ажилчдын нийгмийн асуудлыг шийдвэрлэх, амьдрах орчныг сайжруулах зорилгоор ерөнхий боловсролын сургууль болон сургуулийн өмнөх боловсролын байгууллагын нийт 31 багшид тус бүр 10 сая төгрөгийн буцалтгүй тусламж олгосон бөгөөд  нийтдээ 320 сая төгрөгийн дэмжлэгийг үзүүлсэн байна. Энэ хичээлийн жилд 10 багшид мөн “Нийгмийн баталгаа-2024” арга хэмжээний хүрээнд дэмжлэг үзүүлэхээр болжээ. 

Дэлхийн эрүүл мэндийн байгууллагаас хүн амын шүд, амны хөндийг эрүүлжүүлэх нь хүний биеийн бүхий л эрхтэнд нөлөөлөх байнгын голомтод халдварыг багасган эрүүлжүүлэх чухал хүчин зүйл гэж үздэг. Тиймээс дүүргийн зүгээс амны хөндийн эрүүл ахуйг сайжруулах, олон улсын жишиг сургуулийг бий болгох зорилгоор “Жайка” олон улсын байгууллага, Япон улсын Эрүүл хотуудыг дэмжигч ашгийн бус байгууллага, Япон улсын Шүдний эмнэлгүүдийн холбоотой хамтран дүүргийн ерөнхий боловсролын 37, 50 дугаар сургуульд “Амны хөндийн эрүүл ахуй”-н төслийг 2022-2025 оныг хүртэлх хугацаанд хэрэгжүүлэхээр шийдвэрлэж, жил бүр Японы эмч нарын шүдний үзлэг оношилгоог тогтмол явуулснаар нийт 2305 хүүхдэд зөвлөгөө эмчилгээг хийж байна. 

Сургуулийн өмнөх байгууллагуудын анги танхимыг хивс хивсэнцэр мөн зөөлөн эдлэлээр хангах төсөл арга хэмжээний үр дүнд бүх цэцэрлэгийг 612 сая гаруй төгрөгийн ор дэрний хэрэгсэл, хөнжил хэрэглэл, 250 сая төгрөгийн өртөг бүхий 46 ширхэг хивс, 1890 метр дрожоор хангав.

2020-2023 онд элсэлтийн ерөнхий шалгалтдаа амжилт үзүүлсэн хамгийн өндөр буюу 800 оноог давхардсан тоогоор 47 сурагч авчээ. Түүнчлэн сурагчдаа бэлтгэсэн 27 багшийг дүүргийн Засаг даргын тамгын газраас урамшуулан, 37 сая төгрөгийн мөнгөн урамшууллыг олгов. 

Чингэлтэй дүүрэгт 2023-2024 оны хичээлийн жилд нэг сургууль, хоёр цэцэрлэг шинээр барьж ашиглалтад орууллаа. Ингэснээр бяцхан хүүхэд, сурагчдаа хүлээн авахад бэлэн болоод байна. 

Дүүргийн төсвийн хөрөнгөөр 47 төсөл арга хэмжээг долоон тэрбум 589 сая 800 мянган төгрөгийн санхүүжилтээр таван цэцэрлэг, зургаан сургуулийн урсгал засварыг шийдвэрлэжээ. Нийслэлийн төсвийн хөрөнгө оруулалтаар 15 төсөл арга хэмжээг 10 тэрбум 072 сая төгрөгийн урсгал засвар, тоног төхөөрөмж, улсын төсвийн хөрөнгө оруулалтаар 18 төсөл арга хэмжээг 30 тэрбум 320 сая төгрөгийн сургууль, цэцэрлэгийн хөрөнгө оруулалтыг боловсролын салбарт оруулаад байна.

Эх сурвалж: Монголын үнэн сонин №041/24572/