ВИДЕО: Засгийн газрын хуралдааны ШИЙДВЭР

Засгийн газрын ээлжит хуралдаан боллоо. Хуралдаанаар шийдвэрлэсэн асуудлын талаар мэдээлэл хийв. ЗГХЭГ-ын дарга Д.Амарбаясгалан, Ерөнхий сайд өнгөрсөн долоо хоногт Засгийн газрын гишүүдийн хамт МҮХАҮТ-ын шинэ удирдлагууд болон бизнес эрхлэгчидтай зөвлөлдөх уулзалт хийсэн. Бизнесийн орчныг дэмжих, хууль эрх зүйн өөрчлөлт оруулах зэргээр санал солилцсоны дагуу эрх зүйн орчныг боловсронгуй болгох зорилгоор таван хуульд өөрчлөлт оруулахаар ажиллаж байна. Худалдаа, аж үйлдвэрийн танхимын тухай хуулийн шинэчилсэн найруулгын төсөлд:

МҮХАҮТ-ын бүтэц нь 21 аймаг, Улаанбаатар хотод танхимын салбар байгуулагдаж, бизнес эрхлэгчдийг нийтэд нь төлөөлдөг бүтцээр явж ирсэн. Энэ удаагийн өөрчлөлтөөр танхимыг бүрдүүлж байгаа салбар танхимууд буюу мэргэжлийн холбоод нь салбар бүрийг төлөөлдөг болох зарчим руу шилжиж байна. Уул уурхайн бизнес эрхлэгчид нэгдэж, уул уурхайн бизнес эрхлэгчдийн салбар танхимыг МҮХАҮТ-ын дотор байгуулж болно. Тэдгээр мэргэжлийн холбоод нь нэгдэж МҮХАҮТ-ыг бий болгодог загвар руу орж байгаа юм. Энэхүү загвар нь ХБНГУ, Турк, БНСУ зэрэг улсад туршигдсан, идэвхтэй үйл ажиллагаагаараа дамжуулан төрийн зарим чиг үүргийг хувийн хэвшлийнхэн бүрдүүлэх боломжийг нээдэг давуу талтай гэлээ. 

 
Их өгөгдлийн (big data) сан үүсгэж, хэрэглээнд нэвтрүүлнэ
Монгол Улсын Засгийн газрын тухай хууль, Статистикийн тухай хууль, Нийтийн мэдээллийн ил тод байдлын тухай хууль, Хүний хувийн мэдээлэл хамгаалах тухай хуулийн заалтыг үндэслэн Их өгөгдлийн сан үүсгэж, хэрэглээнд нэвтрүүлэхийг Үндэсний статистикийн хорооны дарга Б.Батдаваад зөвлөж, дэмжлэг үзүүлж ажиллахыг Цахим хөгжил, харилцаа холбооны сайд Н.Учралд даалгалаа.
Сан үүсгэхэд мэдээллийн эзнийг тодорхойлох боломжгүй болгон, төрийн мэдээлэл солилцооны систем (ХУР)-ээр дамжуулах нөхцөлийг бүрдүүлэхийг И-Монгол академи УТҮГ-ын захирал Б.Мягмарнаранд үүрэг болголоо.
            Үндэсний статистикийн хороо нь улсын хэмжээний дата мэдээллээс статистик мэдээлэл боловсруулдаг. Статистикийн мэдээлэлд үндэслэн нийгэм эдийн засгийн хэмжээнд бодлогын шийдвэр гаргах үндэслэл болдог.
            Харин манай улсын хувьд Хүний хувийн мэдээлэл хамгаалах тухай хуульд “...хүнийг тодорхойлох боломжгүй болгож түүх, эрдэм шинжилгээ, урлаг, утга зохиолын бүтээл туурвих, статистикийн мэдээлэл бэлтгэх...” гэж заасан байдаг. Энэ хуулийн хүрээнд төрийн байгууллагуудад бүрдүүлж буй төрөлжсөн бүртгэлийн 152 төрлийн мэдээллийн сангаас биг дата үүсгэж төрөөс гаргаж буй шийдвэр хэр оновчтой байгааг тодорхойлох боломж бүрдүүлнэ” гэж ЦХХХ-ны сайд Н.Учрал хэллээ.
 
Товч мэдээ:
·      Хөгжлийн бэрхшээлтэй хүний эрхийг хангах зөвлөлийн бүрэлдэхүүн, Хөгжлийн бэрхшээлтэй хүний эрхийг хангах орон тооны бус зөвлөлийн ажиллах журмыг шинэчлэн баталлаа.  
·      Төрийн үйлчилгээний төлбөр тооцооны нэгдсэн систем хөгжүүлж нэвтрүүлэх ажлыг зохион байгуулж ажиллахыг Цахим хөгжил, харилцаа холбооны яаманд даалгалаа. Мөн Монголбанкны TSP (Token service provider) системд холбогдох, төрийн үйлчилгээний төлбөр тооцоонд DEBITгүйлгээг нэвтрүүлэх, төрийн үйлчилгээний төлбөр тулгалт, төлбөрийн буцаалтыг цахимаар хийх, банкны карт уншигч төхөөрөмжөөр төрийн үйлчилгээний төлбөрийг хүлээж авах нөхцөлийг бүрдүүлэхийг Сангийн яаманд даалгалаа.