ШУУД: Зэвсэгт хүчний 326 дугаар ангид алба хааж байсан цэрэг амиа алдсан талаар мэдээлэл хийж байна

Зэвсэгт хүчний 326 дугаар цэргийн ангид  цэрэгт татагдсан 21 настай залуу шөнө унтаад сэрээгүй гэх шалтгаанаар энэ сарын 13-ны өдөр амиа алдсан нь харамсалтай хэрэг гарлаа.  Эрүүл саруул өсгөж, хүмүүжүүлсэн, их сургуулиа төгсөх байсан хүү нь цэргийн албанд татагдаад 20 хоноогүй нас барсан мэдээнд эцэг эхийг нь  уй гашууд автуулж,  үхлийн шалтгааныг тодруулахаар цэргийн ангийн гадна хоносон нь олон нийтийг цочирдуулав. 

Үүнтэй холбоотой прокурорын газраас мэдээлэл хийж байна. Мөрдөн байцаах албаны дарга Мишигдорж: 

-Прокурорын зөвшөөрлийн дагуу мэдээлэл хийнэ. Талийгаачийн үхлийн шалтгааныг тогтоохоор тухайн ангид мөрдөн шалгах ажиллагаа явуулж байна. Тухайн цэргийн ангийн ундны уснаас шинжилгээ авч байна. Талийгаач өмнөх өдөр өглөөний жагсаалт, биеийн тамир, оройн хоолондоо орсон байдаг. Энэ сарын 13-ны өглөө 06:00 цагт өглөөний бослогодоо босоогүй, амь насаа алдсан байдаг. 

Цогцост шүүх шинжилгээ хийсэн. Одоогооор шинжилгээний хариу гараагүй байна. Цэргийн байрлалд байгаа камерийн бичлэгүүдийг ар гэрийн хүсэлтийн дагуу үзүүлэхээ мэдэгдсэн гэв.