“Хурдасгуур” төвийнхөн орон нутгийн төрийн албанд өргөн хүрээний судалгаа хийжээ

Шинэ сэргэлтийн бодлогын “Хурдасгуур” төвийн   зүгээс орон нутагт төрийн албаны судалгаа хийлээ. Тодруулбал,  тус төвийн “Ногоон, бүтээмжтэй хөгжлийн бодлогын газар”-ын дарга Б.Азаар ахлуулсан “Төрийн албаны чанарын судалгаа”-ны багийн гишүүд  орон нутгийн баруун ба зүүн бүсээс  сонгогдсон Ховд, Баянхонгор, Сэлэнгэ, Дорнод аймгийн  нэг сумын төрийн захиргаа болон төрийн улс төр, төрийн үйлчилгээний нийт 1012 албан хаагчтай ярилцлага хийж, судалгааны ажлыг өрнүүлсэн байна. 

Уг судалгааны ажлыг    өнгөрсөн  сарын 30-наас энэ  сарын 24-ний хооронд  хийжээ.  Энэхүү судалгааг   төрийн албан хаагчдын ажиллаж буй орчин нөхцөл, ажлын байрны сэтгэл ханамжийн талаар чанарын мэдээлэл цуглуулан, шинжлэх, төрийн албан хаагч ажлаасаа гарч байгаа нийтлэг шалтгааныг тодорхойлон, тэдгээрийг арилгах арга хэмжээний санал боловсруулан, холбогдох байгууллагуудад мэдээлэх, зөвлөмж хүргүүлэх зорилготойгоор хийсэн аж.  

Мөн  орон нутагт ажиллах томилолтын үеэр  “Шинэ сэргэлтийн бодлого”, “Төрийн бүтээмжийн сэргэлт”-ийн хүрээнд орон нутгийн төрийн албан хаагчдын мэдлэг чадварыг дээшлүүлэх, харилцан туршлага солилцох, төрийн бүтээмжийг нэмэгдүүлэх чиглэлээр нэгдсэн удирдлага, зохион байгуулалтаар хангах зорилгоор  энэ сарын 23-ны өдөр Дорнод аймгийн Засаг даргын тамгын газраас “Төрийн албан хаагчдын зөвлөгөөн”-ийг Дорнод аймгийн 400 гаруй төрийн албан хаагчийг хамруулан зохион байгуулжээ.   Уг зөвлөгөөнд “Хурдасгуур” төвийн  “Ногоон, бүтээмжтэй хөгжлийн бодлогын газар”-ын дарга Б.Аз төрийн бүтээмжийн сэргэлтийн хүрээнд “Төрийн чадамж”-тай холбоотой сэдвээр илтгэл тавьж хэлэлцүүлсэн байна.

М.Өнөр