ЗГХЭГ-ын дарга Д.Амарбаясгалан тэргүүтэй төлөөлөгчид БНХАУ-д албан айлчлал хийлээ. Айлчлалын хүрээнд МАН-ын Ерөнхий нарийн бичгийн даргын хувиар Хятадын Коммунист намын Төв хорооны Улс төрийн товчооны Байнгын хорооны гишүүн Цай Читэй уулзаж, улс төрийн намуудын харилцаа, хоёр талын хамтын ажиллагааны талаар санал солилцсон байна.
Мөн Коммунист намын Төв хорооны Гадаад харилцааны газрын дарга Лю Жяньчаотай уулзалт хийжээ. Ирэх онд Монгол Улс БНХАУ-ын хооронд дипломат харилцаа тогтоосны 75 жил, Найрсаг харилцаа, хамтын ажиллагааны гэрээ байгуулсны 30 жил, хоёр улсын харилцаа иж бүрэн стратегийн түвшинд хүрсний 10 жилийн ой тохиох юм. Сүүлийн жилүүдэд Монгол, Хятадын Иж бүрэн стратегийн түншлэлийн харилцаа эрчимтэй хөгжиж дээд болон өндөр түвшний харилцан айлчлал, уулзалтууд нэмэгдэж буй. Хамгийн гол нь төр, засгийн тэргүүний түвшинд тохиролцсон ажлууд бодит ажил хэрэг болох нь чухал гэдгийг шийдвэр гаргах түвшинд үзэж байгаа.
Энэ тухайд зарим тоо баримт дурдахад, оны эхний есөн сарын байдлаар хоёр улсын худалдааны эргэлт 13.5 тэрбум ам.долларт хүрчээ. Харин ойрын жилүүдэд энэ эргэлтийг 20 тэрбум ам.долларт хүргэхийг зорьж байгаа юм. Ингэхийн тулд худалдааны бүтцийг төрөлжүүлэх талаар энэ удаагийн айлчлалаар мөн хэлэлцсэн байна. Тодруулбал, Д.Амарбаясгалан дарга БНХАУ-ын Хөгжил, шинэчлэлийн хорооны дэд дарга Цун Лянтай уулзжээ. Худалдаа, эдийн засгийг өргөжүүлэхийн тулд хилийн боомтуудыг төмөр замаар шуурхай холбох, дэд бүтцээр харилцан холбогдох ажлуудаа эрчимжүүлэх шаардлагатай байгаа юм. Энэ хүрээнд Гашуунсухайт-Ганцмод, Шивээхүрэн-Сэхэ, Бичигт-Зүүнхатавч зэрэг хилийн боомтуудыг төмөр замаар шуурхай холбох, Ханги-Мандал боомтын төмөр замын холболт, ”Монгол, Хятад, Оросын эдийн засгийн коридор байгуулах хөтөлбөр”-ийн хэрэгжилтийг эрчимжүүлэх, Сэргээгдэх эрчим хүчний чиглэлээр төсөл хэрэгжүүлэх талаар санал солилцсон байна.
Х.Өлзийжаргал
Эх сурвалж: Монголын үнэн сонин №045/24576/
°C
Сэтгэгдэл (0)
Сэтгэгдэл бичигдээгүй байна