Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалт эхэллээ

Монгол Улсын Ерөнхийлөгч У.Хүрэлсүх Арабын нэгдсэн Эмират улсад ажиллаж байна. Тэрбээр  тус  улсын Ерөнхийлөгч Мухаммад бин Заид Аль-Нахъяны урилгаар   ийнхүү  мордсон юм.  Түүний оролцох Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалт өнөөдөр эхэлж байна.   Ерөнхийлөгч У.Хүрэлсүх дээд түвшний уулзалтын үеэр уур амьсгалын өөрчлөлт, цөлжилттэй тэмцэх, дэлхийн дулаарлыг сааруулах асуудлаарх Монгол Улсын байр суурийг илэрхийлж, үндэсний түвшинд хэрэгжүүлж буй бодлого, үйл ажиллагааг танилцуулахын зэрэгцээ зарим улсын Төрийн тэргүүнтэй уулзалт хийнэ. Уур амьсгалын өөрчлөлтийн тухай НҮБ-ын суурь конвенцын Талуудын 28 дугаар бага хурлын үеэр болох дэлхийн удирдагчдын дээд түвшний уулзалтад 140 гаруй улсын төр, засгийн тэргүүн оролцоно.   Ерөнхийлөгч У.Хүрэлсүх айлчлалын эхний өдөр  АНЭУ-ын Ерөнхийлөгч Эрхэм дээд Шейх Мухаммад бин Заид Аль-Нахъянтай уулзсан юм.  Уулзалтаар талууд Монгол Улс, Арабын нэгдсэн Эмират улсын харилцааг өргөн хүрээтэй салбарт өргөжүүлэн хөгжүүлэх асуудлаар санал солилцжээ. Түүнчлэн уур амьсгалын өөрчлөлт, цөлжилт, хүнсний аюулгүй байдал зэрэг дэлхий дахинд тулгарч буй сорилтыг даван туулахад олон улсын хамтын нийгэмлэг төдийгүй улс бүр хувь нэмрээ оруулахын ач холбогдлыг тэмдэглэж, эдгээр чиглэлд хоёр улсын санаачилга, зорилтуудыг уялдуулан үр дүнтэй хамтран ажиллахын чухлыг онцлов. Түүнчлэн  хоёр улсын Төрийн тэргүүн нарын уулзалтын хүрээнд Монгол Улс, Арабын нэгдсэн Эмират улсын хамтын ажиллагааны эрх зүйн орчныг бэхжүүлэх баримт бичгүүдийг байгуулсан байна.  Тухайлбал, дипломат, албан, тусгай болон энгийн паспорт эзэмшигчдийг визийн шаардлагаас чөлөөлөх тухай Засгийн газар хоорондын харилцан ойлголцлын санамж бичгийг байгуулсан. Ингэснээр Монгол Улсын иргэд Арабын нэгдсэн Эмират улсад ирэх сарын 1-нээс эхлэн визгүй  зорчих боломжтой боллоо. Түүнчлэн  худалдаа, эдийн засаг, хүнс, хөдөө аж ахуй, эрчим хүч, уул уурхай, боловсрол, зам тээврийн салбарт хамтын ажиллагааг өргөжүүлэхээр  санал солилцов.

Эх сурвалж: Монголын үнэн сонин №045/24576/