Сөүл хотын шөнийн цэнгээний төв Итаевон дүүрэгт Сүнсний баяр тэмдэглэж байсан 153 хүн олны хөлд дарагдаж амь үрэгдсэн эмгэнэлт явдал болсон. Хохирогчдын ихэнх нь 20 гаруй насныхан байжээ. Амь үрэгдэгсдийн дунд гадаадын 26 иргэн байсан тухай эх сурвалжид дурджээ.
Өмнөд Солонгосын Ерөнхийлөгч Юн Сук Ёол эмгэнэлт явдлыг сайтар мөрдөн шалгахаа амласан. “Рёнхап” агентлагийн мэдээлснээр 133 хүн шархадсанаас 37 нь хүнд бэртсэн байна. Хэргийн тухай дэлгэрэнгүй мэдээлэл гараагүй ч олон нийтийн сүлжээний бичлэгээс үзвэл нарийн гудамжны орох, гарах гарцнаас хүмүүс шахцалдан оржээ. Цугласан олныг хянах, зохицуулах арга хэмжээ аваагүй гэж олон нийт шүүмжилж эхэлсэн.
Ерөнхий сайд Хан Дак Сү дахин ийм хэрэг гарахгүйн тулд Засгийн газар шаардлагатай өөрчлөлтүүдийг хийхээ мэдэгсэн. Мөн хотод дахин эмх замбараагүй байдал үүсэхээс сэргийлж, цагдаагийн хамгаалалт гаргажээ. Сөүл хотын дарга О Се Хун амиа алдсан иргэдэд хүндэтгэл үзүүлэх дурсгалын самбар босгохоо мэдэгдсэн байна. Ковидын хязгаарлалтын улмаас Хэллоуины баярыг хоёр жил тэмдэглээгүй аж. Хэллоуин Солонгосын уламжлалт баяр биш ч Сөүлийн залуус өргөн дэлгэр тэмдэглэдэг. Энэ жил Итаевон дүүрэгт 100 мянга орчим хүн цуглажээ.
Х.Заяа
°C