Зуны XXXIII олимпын тоон статистик

Дөрвөн жилд нэг удаа болдог хүн төрөлхтний их баяр цэнгэл-зуны XXXIII олимп эхлэхэд зургаан сар үлдлээ. Энэ дугаараас Парисын олимптой холбоотой, сонирхолтой баримт, үйл явдлыг онцлон бэлтгэнэ. Парис хотод  1900, 1924 онд зуны олимпын наадмыг зохион байгуулсан. Ирэх долдугаар сарын 26-нд эхлэх зуны олимпын статистик үзүүлэлтүүдээс дурдъя. Олимпын төсөв есөн тэрбум еврод хүрч, нэг тэрбум үзэгч нээлтийн ёслолыг үзэх төлөвтэй байна. Францын үндэсний аудитын байгууллага  нэмж гурван тэрбум евро  зарцуулж магадгүй гэж тооцоолжээ. 

Наадамд оролцох 10500 тамирчин Сент-Денис хотын захын Олимпын тосгонд байрлана. Урилга авсан 203 улсын баг тамирчдын дунд Дүрвэгсдийн  баг багтсанаас гадна ОХУ, Беларусын тамирчид төвийг сахисан байдлаар оролцоно. Тамирчид 329 багц медалийн төлөө өрсөлдөнө.  Парисын аялал жуулчлалын албаны урьдчилсан мэдээгээр олимп үргэлжлэх (долдугаар сарын 26-аас наймдугаар сарын 11)  Паралимпийн наадмын (наймдугаар сарын 28-нд эхэлнэ) хугацаанд 15 сая хүн цэнгэлдэхийн тасалбар захиална. Тасалбар 24-50 еврогийн ханштай. 

Тамирчдын ихэнх нь дотоодын болон Их  Британи, АНУ-ын иргэд байна.  Нээлтийн ёслолын үеэр Сена мөрний эрэг дагуу зогсох 100 мянган хүнд төлбөр төлнө. Нийтийн хэв журам сахиулахад 30 мянган цагдаа, цэргийн 15 мянган алба хаагч үүрэг гүйцэтгэж,  хамгаалалтын компанийн 17 мянган хамгаалагч  ажиллана. Үзэгчдийг хүлээн авч, суулгаж, мэдээлэл өгөх, тамирчдад туслах, допингийн эсрэг шинжилгээнд хамруулах зэрэгт 30 мянган сайн дурын ажилтан туслах аж. Зохион байгуулагчид хүнсний бүтээгдэхүүний 80 хувийг Францад үйлдвэрлэхээ амласан.  Энэ үеэр Парисын метроны тасалбарын үнийг нэмж дөрвөн евро болгохоор төлөвлөжээ. Олимпын нээлт, хаалтыг зохион байгуулах “Стад де Франс” цэнгэлдэх хүрээлэн 78338 суудалтай. Бамбарын буухиад 24 хүний бүрэлдэхүүнтэй баг оролцоно.

Эх сурвалж: Монголын үнэн сонин №003/24582/