Түүх бичиж буй “Их гурвал”

Домогт Роберт де Ниро, Леонардо ди Каприо, Лили Гладстоун нарын хослол  “Цэцэгт сарны алуурчид”киног шүүмжлэгчид онцлох болсон. Найруулагч Мартин Скорсезегийн эл бүтээл “Оскар”-ын 10 төрөлд өрсөлдөнө. Оклахома мужийн уугуул америкчууд 1920-оод онд газрын тосны томоохон ордуудыг илрүүлдэг. Тэд баяжиж, энэ хөрөнгө нь шунахай, шуналтнуудын анхаарлыг татна. “Уилльям хаан” гэгдэх Хейл ийм замаар баяжсан хотын хамгийн эрх мэдэлтэй нь. Тэр зээ хүүдээ гэр бүлийн хөрөнгө босгож өгөхийн тулд шударга, буяны үйлстэн мэт харагдахыг хичээдэг. Гэхдээ түүний дотор ямар хүн бодитоор оршин байгааг хэн ч төсөөлөхгүй. Аймшигтай алуурчны нууцлаг төрх нийгмийг  донсолгоно. Өргөн утгаараа “Цэцэгт сарны алуурчид” Америкийн түүхийг үргэлжлүүлэн харуулсан гайхалтай бүтээл.  Кино 206 минут үргэлжлэх ба этгээд найруулагч Скорсезегийн карьерынх нь хамгийн урт бүтээл юм. Хорон санаатнуудын гарт гэр бүлээ алдсан эмэгтэйг Лили Гладстоун дэлгэцнээ амьдруулсан. Тэрбээр “Оскар”-ын наадмын 96 жилийн түүхэнд шилдэг эмэгтэй дүрийн төрөлд нэр дэвшсэн анхны уугуул америк хүн болж байна. Энэ дүрээрээ “Алтан бөмбөрцөг” хүртсэн билээ. Лили Гладстоун түүх бүтээх эсэх нь ирэх сарын 11-нд тодорхой болно. Тэрбээр 1986 оны наймдугаар сарын 2-нд Монтана мужийн Калиспелл хотод төрсөн. Лили Гладстоун Монтанагийн их сургуулийг жүжигчин, найруулагч мэргэжлээр бакалавр зэрэгтэй төгссөн байна. Түүний найруулсан анхны кино  2012 онд “Jimmy P: Psychotherapy of a Plains Indian” нэрээр дэлгэцээр гарчээ.

 Х.Эрдэнэзаяа

Эх сурвалж: Монголын үнэн сонин №004/24583/