Мэндчилгээ

Эрхэм хүндэт ахмад буурлууд, МАН-ын ахмад гишүүд, дэмжигчид ээ!

Та бүхэндээ XVII жарны “Хилэнт эх” хэмээх модон луу жилийн Сар шинийн мэнд дэвшүүлж, ирж буй онд элэг бүтэн, төвшин амгалан, үр хүүхэд, ач үрс, айл хотлынхоо хүндэтгэлийг хүлээн, алтан сургаал, амьдралын баялаг туршлагаараа залуу хойч үедээ түшиг, нөмөртэй, аз жаргалтай байхын ерөөл дэвшүүлье.

Монгол Улс тусгаар тогтнолоо сэргээн олж авч баталгаажуулах, хөгжүүлэх, ардчилсан засаглалын үндэс болсон шинэ Үндсэн хуулийг батлан мөрдүүлэхэд залуу насныхаа эрч хүч, итгэл үнэмшлийг зориулсан МАН-ын гишүүн, дэмжигчид, өнөөгийн ахмадууд манлайлан түүхэн ололтуудад хүргэсэн нь маргашгүй үнэн билээ.

Дэлхий даяар сүүлийн олон арван жил болоогүй өөрчлөлтүүд гарч улс үндэстэн бүр цаашдын хөгжил, дэвшил, оршин тогтнохуйн нөхцөл байдлаа шинжин тодорхойлж байна. Монгол Улс дунд, урт хугацааны тогтвортой, залгамж чанартай хөгжлийн үзэл баримтлал, бодлогоо батлан, түүнийг хэрэгжүүлэх арга, замаа тогтоох эрх зүйн шинэчлэлийн үндэс сууриа тавилаа. Түүхийн нэн хариуцлагатай энэ үед манай ахмадууд улс Монголынхоо хувь заяаг хөтлөх бодлого, шийдвэр гаргах, хэрэгжүүлэхэд жинтэй хувь нэмрээ оруулна гэдэгт итгэлтэй байна.

Бид ахмадын амьдрал, халамж, асаргаа, хөдөлмөр эрхлэлтийн хуримтлагдсан олон асуудлыг эдийн засгийн хүч боломжоо ашиглан шат дараатайгаар шийдэж байна. МАН санаачлан төрөөс хэрэгжүүлж буй эдгээр арга хэмжээг гүнзгийрүүлэн хууль, эрх зүйн орчныг нь шинэчлэн баталгаажуулах зорилгоор УИХ-д лобби бүлэг байгуулагдан манай холбоо, Монголын ахмадын холбоо, ХНХЯ-тай хамтран хуулийн төслүүдийг боловсруулан бэлдэж байгаа бөгөөд  тэдгээрийг удахгүй эхлэх УИХ-ын хаврын чуулганаар хэлэлцэн батлахаар төлөвлөж байна. Ингэснээр нийгэм, эдийн засгийн амьдралд ахмадын оролцоог нэмэгдүүлэх, тэдний амьдралын чанарыг дээшлүүлэхэд бодитой, эерэг өөрчлөлт оруулна гэж үзэж байна.

Ирж буй луу жилд төрийн бодлого, шийдвэр гаргахдаа шинэ нөхцөл зохицуулалтаар ажиллах УИХ-ын нэн харуцлагатай сонгууль болно.

Энэ сонгуульд МАН-ын ахмад гишүүд, сонгогчид, манай нийт ахмадууд та бүхнийгээ үндэсний эрх ашиг, өнөө, ирээдүй, хойч үеийнхнийхээ сайн сайхны төлөө санал, бодлоо тунгаан нэгтгэж, идэвхтэй оролцохыг уриалж байна.

Та нар маань Сар шинэдээ сайхан шинэлээрэй.

                Монгол Улсын Их Хурлын  Төрийн байгуулалтын  байнгын хорооны дарга,

                МАН-ын дэргэдэх Социал демократ Ахмадын холбооны тэргүүн Н.Энхболд