“Старлинк" Монгол дахь үйлчилгээгээ энэ сард нээнэ

ЦХХХ-ны сайд Н.Учрал АНУ-д хийсэн айлчлалынхаа хүрээнд Элон Маскийн удирддаг “SрасеХ” компанийн төвөөр зочилж, үйл ажиллагаатай нь танилцжээ. “SрасеХ” компанийн дэд ерөнхийлөгч Том Очинеротой уулзсан уулзалтын үеэр “Старлинк”-ийн Монгол дахь үйлчилгээг энэ сарын 26-ны өдөр Испани улсын Барселона хотноо зохион байгуулагдах Дэлхийн үүрэн холбооны конгресс (ММС)-ын үеэр албан ёсоор нээхээр тохиролцсон байна. “Старлинк” компани нь АНУ, Англи, Франц, Шинэ Зеланд, Япон, Филиппин зэрэг дэлхийн томоохон улсуудад үйлчилгээ хүргэж байгаа юм.
Өнөөдрийн байдлаар 4000 гаруй нам орбитын хиймэл дагуул хөөргөн дэлхийг хамарсан хиймэл дагуулын өндөр хурдны интернэтийн сүлжээг бий болгочихоод байгаа юм. Тус төслийг Монгол Улсад хэрэгжүүлснээр өргөн уудам газар нутагтай манай улсын өнцөг булан бүрд интернэт хэрэглээ хангагдах төдийгүй гамшгийн үед, онцгой байдлын үед мөн малчин тариаланч, тээвэрчид, аялал жуулчлалын аж ахуйн нэгжүүдийн үйл ажиллагаанд онц чухал ач холбогдолтой гэж үзэж буй. Мөн Франц улсын Таллес Алениа компанитай хамтарч хэрэгжүүлэхээр ажиллаж буй үндэсний хиймэл дагуулыг 2027 онд “SрасеХ” компаниар хөөргөх гуравласан хамтын ажиллагааны бэлтгэл ажлыг эхлүүлэхээр тогтжээ.