Монгол Улсын Засгийн газар Дэлхийн засгийн газруудын дээд хэмжээний уулзалтаас “Global Government Excellence Award” шагнал хүртлээ. Тодруулбал, Арабын нэгдсэн Эмират улсын Дубай хотноо энэ сарын 12-14-ний өдрүүдэд зохион байгуулж буй Дэлхийн засгийн газруудын дээд түвшний уулзалтаас Монгол Улсын Засгийн газарт “Global Government Excellence Award” шагнал гардуулав.
Энэхүү нэр хүндтэй шагналыг Засгийн газруудын шинэ технологи, инновацад суурилсан цахим шилжилтийг амжилттай, үр дүнтэй хэрэгжүүлсэн шилдэг туршлагад олгодог байна. Тэгвэл Монгол Улсын хувьд Засгийн газар, Ерөнхий сайд Л.Оюун-Эрдэнийн манлайлал дор хэрэгжүүлж буй шилэн ажиллагаа, ил тод байдал, “Цахим үндэстэн-И-Монгол” санаачилгын хүрээнд төрийн үйлчилгээг иргэнд ойртуулах, хялбаршуулах, нээлттэй, ил тод болгох чиглэлд гаргаж буй үр дүнг олон улсын хэмжээнд ийнхүү тэргүүн туршлага хэмээн үнэлжээ.
Шагналыг тус Дээд түвшний уулзалтад Монгол Улсын Засгийн газрыг төлөөлөн оролцож буй Цахим хөгжил, харилцаа холбооны сайд Н.Учрал Арабын нэгдсэн Эмират улсын Ерөнхийлөгчийн ордны Хөгжлийн бодлогын газрын дарга эрхэм дээд ханхүү Шейх Диаб бин Мухаммад бин Заид Аль-Нахъянаас гардан авчээ.
С.Аз
Эх сурвалж: Монголын үнэн сонин №006/24585/
°C
Сэтгэгдэл (0)
Сэтгэгдэл бичигдээгүй байна