Л.Оюун-Эрдэнэ: Засгийн газрын үйл ажиллагааны хөтөлбөр хөгжлийн суурь реформын эхлэл байх болно

УИХ-ын ээлжит сонгуулийн дүнд байгуулагдсан хамтарсан Засгийн газрын үйл ажиллагаа эрчимжиж эхэллээ. Тодруулбал, Хамтарсан Засгийн газрын “Хурдтай хөгжлийн төлөөх зориг” гэрээнд МАН, АН, ХҮН намын удирдлагууд гарын үсэг зурлаа. Улмаар Засгийн газрын 2024-2028 оны үйл ажиллагааны хөтөлбөр, энэ оны төсвийн тодотголын төслийг УИХ-д өргөн мэдүүлэв. Тодруулбал, хамтарсан Засгийн газрын “Хурдтай хөгжлийн төлөөх зориг” гэрээнд МАН-ын  дарга, Ерөнхий сайд Л.Оюун-Эрдэнэ, АН-ын дарга, Тэргүүн шадар сайд Л.Гантөмөр, ХҮН намын дарга, Шадар сайд Т.Доржханд нар гарын үсэг зурсан юм. Талууд Монгол Улсын хөгжлийн тулгамдсан асуудал, тулгарч байгаа сорилтыг илүү хурдан, үр дүнтэйгээр хамтран шийдвэрлэхээ илэрхийлж, 2024 оны сонгуулиар УИХ-д суудал авсан МАН, АН, ХҮН намын сонгуулийн мөрийн хөтөлбөрт тусгасан нийтлэг зорилтыг гэрээнд тусгажээ. Тухайлбал, МАН-ын мөрийн хөтөлбөрт тусгасан нийгмийн бодлогын шинэчлэл, бүсчилсэн хөгжлийн бодлого, авлигагүй төр, шударга ёсыг бэхжүүлэх цахим засаглал, эхлүүлсэн томоохон төсөл, хөтөлбөрүүдийг үргэлжлүүлэн хэрэгжүүлэх зорилтууд, АН-ын мөрийн хөтөлбөрт тусгасан хүний хөгжил, хувийн өмчийн эрхийн хамгаалалт, технологи суурьтай мэдлэгийн эдийн засаг, бизнес, хөрөнгө оруулалтын орчин, эдийн засгийн эрх чөлөөг баталгаажуулах, шударга төрийн зорилтууд, ХҮН намын мөрийн хөтөлбөрт тусгасан эрчим хүчний болон боловсролын салбарын реформ, гадаад худалдаа, хөрөнгө оруулалт, төрийн худалдан авах ажиллагааны бодлогыг шинэчлэх, төрийн өмчит компанийн засаглалыг сайжруулах зорилтуудыг багтаасан байна. Үүний тулд бүсчилсэн хөгжлийн, хүний хөгжлийн, хүний эрхийг дээдэлсэн засагласан бодлого, эдийн засгийн бодлогыг хамтарсан Засгийн газрын тэргүүлэх чиглэл болгон ажиллахаа ажээ.  Энэ хүрээнд хэрэгжих төсөл, хөтөлбөрийг үр дүнтэй хэрэгжүүлэхийн тулд инновац, шинжлэх ухааны ололтод тулгуурлан, их өгөгдөлд суурилан, мэргэжлийн экспертүүдийн зөвлөмжид үндэслэн, хөрөнгө оруулагчид, хувийн хэвшил, мэргэжлийн холбоод, иргэний нийгэм, их, дээд сургуулиудын идэвхтэй түншлэлийг бүх талаар дэмжин хамтран ажиллахаар тохирлоо.

Ийнхүү хамтарсан Засгийн газрын гэрээнд талууд гарын үсэг зурж баталгаажуулсантай холбогдуулан дараагийн алхам болох Засгийн газрын 2024-2028 оны үйл ажиллагааны хөтөлбөрийг УИХ-аар батлуулахаар өргөн барилаа. Түүнчлэн төсвийн тодотголыг ч  УИХ-ын ээлжит бус чуулганаар хэлэлцэхээр болж байна. Тодруулбал,  Монгол Улсын Ерөнхий сайд Л.Оюун-Эрдэнэ, Тэргүүн Шадар сайд Л.Гантөмөр, Шадар сайд Т.Доржханд нарын хамт Засгийн газрын 2024-2028 оны үйл ажиллагааны хөтөлбөр, Монгол Улсын 2024 оны төсвийн тухай хуульд өөрчлөлт оруулах тухай болон бусад дагалдах хуулийн төслийг  УИХ-ын дарга Д.Амарбаясгаланд өргөн мэдүүллээ. Засгийн газрын 2024-2028 оны үйл ажиллагааны хөтөлбөр шинэ 30 жилийн эхлэлийг зөв тавих нийгэм, эдийн засгийн хөгжлийн суурь реформын эхлэл гэдгийг Ерөнхий сайд энэ үеэр онцлон тэмдэглэсэн. Төслийг боловсруулахдаа “Алсын хараа-2050”, “Бүсчилсэн хөгжлийн үзэл баримтлал” зэрэг Монгол Улсын урт, дунд хугацааны хөгжлийн бодлогод нийцүүлж, 2024 оны сонгуулиар УИХ-д суудал авсан МАН, АН, ХҮН намын сонгуулийн мөрийн хөтөлбөрт тулгуурлан, төр, хувийн хэвшил, эрдэм шинжилгээ, судалгаа, иргэний нийгэм болон олон улсын байгууллагуудын саналыг тусгажээ. Засгийн газрын үйл ажиллагааны хөтөлбөрт бодлогын үндсэн дөрвөн чиглэлийг тодорхойлж, тэдгээрийн хүрээнд тус бүр дөрвөн зорилго, нийт 593 үйл ажиллагааг хэрэгжүүлэхээр төлөвлөсөн байна.  Энэ оны төсөвт тодотгол хийж буй гол үндэслэл нь УИХ-ын ээлжит сонгуулийн үр дүнд шинээр байгуулагдсан Засгийн газрын 2024-2028 оны мөрийн хөтөлбөрт тусгаж байгаа мега төслүүдийн ажлыг шууд эхлүүлэхэд шаардлагатай санхүүжилтийг шийдвэрлэхэд чиглэж байгаа аж. 

М.Өнөржаргал

Эх сурвалж: Монголын үнэн сонин №030/24609/