“Хөх чононууд” Хятадын шигшээ багийг эх орондоо хүлээн авна

Монгол Улсын шигшээ баг “FIBA Asia Cup 2025 Qualifiers” буюу Азийн цомын тэмцээний урьдчилсан шатны тэмцээний хэсгийн тоглолтод учраа таарсан  БНХАУ-ын шигшээ багийг эх орондоо хүлээн авч байна.  Хятадын багийн эсрэг  тулаанаа ирэх ням гарагт  хийх юм.  Азийн цомын тэмцээний урьдчилсан шатанд Монгол Улсын шигшээ баг Гуам, Хятад, Японы хүчирхэг багуудтай учраа таарсан. Хэсгийн багууд хоорондоо хоёр тоглолт хийх хуваарьтай. Манай улс хэсэгтээ нэг ч хожигдол хүлээгээгүй хүчирхэг Японы шигшээ багтай Уцүномияа хотын “Никкан Точиги” цэнгэлдэхэд өнгөрсөн пүрэв гарагт тоглосон. Японы шигшээ багийн ахлах дасгалжуулагчаар АНУ-ын иргэн Том Ховассе ажилладаг.  Тэрбээр Японы шигшээ багаа удирдаж “Парис 2024” зуны олимпын их наадамд амжилттай өрсөлдсөн бөгөөд мөн 2023 оны Сагсан бөмбөгийн ДАШТ-д таван тоглолт хийхэд хоёр хожигдолтой 19 дүгээр байрт эрэмбэлэгдсэн юм. Япончууд Хятадын багийг 76:73-аар буулгаж авсан нь 88 жилийн дараа олон улсын сагсан бөмбөгийн томоохон тэмцээнд эртний өрсөлдөгчөө анх удаа хожсон. Мөн Гуамын шигшээг талбай дээрээ 77-56 харьцаатай төвөггүйхэн буулгаж авсан юм.  Хятад, Гуамын шигшээ багуудтай хийсэн тоглолтод үндэслэн голлох статистик үзүүлэлтүүдийг гаргажээ. Сонирхуулахад, Монгол Улсын сагсан бөмбөгийн шигшээ баг анх удаа Маскот буюу бэлгэ тэмдэгтэй болсон. Уг дүр нь “Blue Wolves” буюу “Хөх чононууд” нэртэйгээр гарсан байна. Энэ нэрээр шигшээ баг олон улсын Сагсан бөмбөгийн ертөнцөд аль хэдийнээ танигдсан билээ. Талын монголчуудын эрч хүч эрэмгий дайчин чанарын бэлгэдэл болсон хөх чонын өнгө дүрсийг сонгосон нь  шигшээ багийн сүнс, үнэт зүйлийг агуулсан шинэ уур амьсгал, бахархал бий болгох зорилготой аж.

Үндэсний шигшээ багийн бүрэлдэхүүн

“FIBA Asia Cup 2025 Qualifiers” тэмцээний урьдчилсан шатны хэсгийн тоглолтод БНХАУ-ын шигшээ багийн эсрэг тоглох Монгол Улсын шигшээ багийн 12 тоглогч тодорсон. Өргөтгөсөн бүрэлдэхүүнд дуудагдсан 18 тоглогчоос дасгалжуулагчдын баг дараах 12 тоглогчийг сонгожээ.
 А. Азбаяр
Б. Билгүүн
А. Энхбаясгалан
О. Эрдэнэцогт
Ч. Маргад
Г. Одбаяр
Ч. Ихбаяр
Г. Болор-Эрдэнэ
М. Өлзий-Орших
Т. Ууганбаяр
Б. Тулуй
Э. Саруул-Эрдэнэ
Ахлах дасгалжуулагчаар Василис Фрагкиас, туслах дасгалжуулагчаар Велибор Негованович, Б.Тамжид, А.Азбаяр нар ажиллаж байна.  Манай шигшээ баг өөрсдөөс шалтгаалах бөмбөг алдалт, самбарын хашилтаа сайжруулан, багийн алдаагаа хянаж, хоорондын ойлголцол сайн байж чадвал хүчирхэг Японы шигшээ багтай ойрхон оноонд өрсөлдөх боломж байгааг статистик үзүүлэлт харуулж байна. Монгол Улсын Үндэсний шигшээ багтаа амжилт хүсье.

 Х.Заяа

Эх сурвалж: Монголын үнэн сонин №044/24623/