​ Т.Мөнхсайхан: Улсын эмнэлгүүд төлбөртэй үйлчилгээ үзүүлэхгүй

 Эрүүл мэндийн даатгалын сангийн санхүүжилт зогссоны улмаас улсын зарим эмнэлэг тусламж үйлчилгээгээ төлбөртэй болгосон гэх мэдээлэл олон нийтийн сүлжээнд тархсан. Тэгвэл үүнд Эрүүл мэндийн сайд Т.Мөнхсайхан тайлбар өгөхдөө “Улсын эмнэлгүүд иргэдээс, хувь хүнээс төлбөр авч, үйлчилгээ үзүүлэхгүй. Эрүүл мэндийн даатгалын сан хүнд нөхцөл байдалтай байгаа нь үнэн. Гэхдээ тусламж үйлчилгээгээ зогсоох хэмжээнд хүндрээгүй. Мэдээллийн дутуу байдлаас болоод ойлголтын зөрүү гарчээ. Монгол, Японы эмнэлгийн тухайд энэ жил тусламж үйлчилгээ үзүүлэхээр Эрүүл мэндийн даатгалын ерөнхий газартай байгуулсан гэрээнийх нь мөнгөн дүн хэтэрсэн. Тиймээс нэн шаардлагатай бус тусламж үйлчилгээнүүдээ зогсоох шаардлага тавьсан. Түүнээс бус иргэдээс төлбөр авч үйлчилгээ үзүүлэх ямар нэгэн шийдвэр хаана ч гараагүй. Эрүүл мэндийн даатгалын сангийн санхүүжилт хязгаарлагдмал. Энэ жилийн хувьд 1.093 их наяд төгрөгийн санхүүжилт төвлөрсөн даатгалын сан. Сар болгон зарцуулалтыг нь зохистой хийхгүй, эхний саруудад хэт их санхүүжилт гаргаснаас болоод Эрүүл мэндийн даатгалын санд доголдол үүссэн. Тиймээс сайдын багцад байгаа төсвөөсөө хэмнэлт хийж Эрүүл мэндийн даатгалын сан руугаа шилжүүлж тусламж үйлчилгээний санхүүжилтээ тасалдуулахгүйгээр явуулж байна” хэмээлээ.

 Эх сурвалж: Монголын үнэн сонин №044/24623/