Урьдчилан сэргийлэх ажилд анхаарал хандуулж, боловсон хүчнээ чадавхжуулсан жил

2024 оныг “Нийгмийн эрүүл мэндийг дэмжих жил” болгон зарласан ЭМЯ өвчин эмгэгээс урьдчилан сэргийлэх ажилд анхаарал хандуулан, боловсон хүчнээ чадавхжуулж эхлээд байна. Тус яамны мэргэжлийн удирдлагын багийнхан Монгол Улсад оношилж, эмчлэх боломжгүй 26 өвчний эмчилгээг нэвтрүүлэх ажлыг эрүүл мэндийн салбарын шинэчлэлийн хүрээнд хийж байгаа юм. ЭМЯ, НҮБ-ын Хүүхдийн сантай хамтран Харвардын Анагаах ухааны их сургуулиас зохион байгуулдаг “Эрүүл мэндийн салбарын манлайлал” сэдэвт нэг жилийн хөтөлбөрт хамруулах сонгон шалгаруулалтыг эхлүүлсэн. Энэхүү хөтөлбөрийн хүрээнд таван жилийн туршид Монгол Улсын Эрүүл мэндийн салбарт 100 залуу манлайлагчдыг бэлтгэх бөгөөд 2023-2024 онд эхний 20 хүнийг амжилттай хамруулсан нь эх орондоо мэргэжлээрээ ажиллаж байна.  

Өөр нэгэн онцлох ажил нь сургуульд суурилсан эрт илрүүлгийн тогтолцоог бий болгосон явдал юм. Энэ хүрээнд ерөнхий боловсролын сургуулийн нэгдүгээр ангийн сурагчдын нүд, шүд, зүрхний эмгэгийн эрт илрүүлгийн үзлэгийг өнгөрсөн аравдугаар сард эхлүүлсэн бөгөөд эхний ээлжид нийслэлийн сурагчдыг хамруулж байна.

Шүдний үзлэгт 19933 сурагч хамрагдсанаас 78.5 хувь өвчлөлттэй гарчээ. Нүдний хараа нь хүүхдийн сурлагад нөлөөлдөг гол хүчин зүйлийн нэг. Гэвч нүдний үзлэгт ороод буй 13882 хүүхдийн 2125 нь холын хараа, 949 нь ойрын харааны өөрчлөлттэй. Мөн 1292 хүүхдийн стерео хараа нь тэнцээгүй аж. Түүнчлэн нэгдүгээр ангийн сурагчдыг зүрхний эмгэгийн эрт илрүүлэгт хамруулсан бөгөөд хүүхдүүдийн 10 орчим хувь нь өөрчлөлттэй гарах магадлалтай байгааг мэргэжлийн эмч нар хэлж байна. 

УИХ-аас гепатитын D вирусийн эмчилгээнд хэрэглэх зорилгоор импортлох булевиртид эмийг Гаалийн болон Нэмэгдсэн өртгийн албан татвараас чөлөөлөх тухай хуулийн төслүүдийг эцэслэн  баталсан нь эрүүл мэндийн салбарын онцлох үйл явдлын нэг байв. Олон улсад ашигладаг нэгдсэн аргачлалаар судлахад манай улсад гепатитын D вирусийн халдвартай 66 мянган хүн байж болзошгүй гэсэн тооцооллыг гаргасан байдаг. Харин элэгний B, D вирустэй иргэдийн ТББ-ынхан 150 мянга орчим хүн байгаа гэдэг бөгөөд энэ хууль батлагдсанаар D вирусийн халдварын эмчилгээг эхлүүлэхэд нэг алхам ойртож байна хэмээн үзэж байгаа юм. Гепатитын D вирусийн халдварыг эмчлэх булевиртид эмийг Европын эмийн агентлаг эмийн бүртгэлд албан ёсоор бүртгэж, гепатитын B, Д вирусийн архаг халдварын эмчилгээнд хэрэглэх зөвшөөрөл олгосонтой уялдуулан манай улс уг эмийг өнчин эмийн жагсаалтад оруулж, гепатитын B, Д вирусийн эмчилгээний заавраа шинэчлэн баталж, 2024 оноос мөрдөж эхлээд байна. 

Зайн оношилгооны төвийн нээлт боллоо. Уг оношилгооны төв нээгдсэнээр рентген, СТ, MRI, мамографик дүрс оношилгооны зургуудыг орон зай цаг хугацаанаас үл хамааран хөдөө орон нутгийн эрүүл мэндийн байгууллагуудаас чанарын өндөр түвшинд стандартын дагуу хүлээн авч дүгнэлтийг нарийн мэргэжлийн эмч нар гаргах боломж бүрдэж байна. Үүний үр дүнд хүний нөөцийн дутагдалтай эрүүл мэндийн байгууллагуудын тусламж үйлчилгээг мэдээллийн технологи ашиглан нөхөх, иргэд харьяа орон нутгаасаа дүрс оношилгооны дүгнэлтийг хүлээн авдаг болсноор хот руу чиглэх иргэдийн хөдөлгөөн багасаж эрүүл мэндийн тусламж үйлчилгээний хүртээмж сайжрах юм.

 Эх сурвалж: Монголын үнэн сонин №048/24627/