Шинэ үйлчилгээ, дэвшилтэт шийдлээр тэргүүлэгч “Тэнгэр белла”

“Гоо сайхан ертөнцийг аварна” гэдэг үг бий. Тэгвэл өөртөө сэтгэл хангалуун, итгэл дүүрэн алхах боломж олгодог "Tenger bella beauty" салоныхан 2025 оныг шинэ үйлчилгээ, дэвшилтэт шийдэлтэйгээр угтжээ. Тодруулбал, тус хамт олон шинэ оны өмнөхөн буюу арванхоёрдугаар сард хөмсгөнд үс суулгадаг шинэ үйлчилгээ нэвтрүүлж, үйлчлүүлэгчдэдээ гэнэтийн бэлэг барилаа. Ингэснээр 20 жилийн туршлагатай хамт олон гоо сайхны салбарт дахин шинэ зам татаж, үйлчлүүлэгчдийнхээ сонголтыг ийнхүү нэмлээ. Тус хамт олны энэхүү шинэ үйлчилгээ, дэвшилтэт шийдлийг бид энэ удаад онцлон танилцуулж байна.

Хөмсгөнд үс суулгах үйлчилгээний дараагийн шат-Уураг үс 

 Нэг үеэ бодвол хөмсөгний шивээс илүү сонголттой болж, энэ төрлийн үйлчилгээ хурдтай хөгжсөөр байгаа. Тухайлбал, үстэй мэт, уусгалттай, 6D гэх мэт олон төрлийн сонголт бий. Тухайн хүний арьсны онцлог, нүүрний хэлбэр, хөмсөгний үсний нарийн, бүдүүн ширхэгээс хамаарч төрөл бүрийн тоног төхөөрөмж ашиглан хүссэн өнгө, хэлбэрээр нь шивдэг болсон. Тэгвэл "Tenger bella beauty" салон өнгөрсөн хугацаанд хөмсгөө шивүүлэх үү, суулгуулах уу гэдэг хувилбартай байсан бол өдгөө шинэ сонголт санал болгож байна. Шинэ сонголт нь хөмсгөнд бэлэн бэлдэц бүхий уураг үс суулгах үйлчилгээ юм. 

Үүнээс өмнө хөмсгөнд үс суулгахдаа тухайн хүний үснээс булцуу авч ашигладаг байсан бөгөөд энэ тохиолдолд бүдүүн ширхэгтэй, шулуун үс ургаж, тогтмол хэлбэржүүлж засах зэрэг асуудал гардаг байжээ. Тэгвэл "Tenger bella beauty" салон энэ төрлийн үйлчилгээний дараагийн дэвшилтэт шийдлийг нэвтрүүлснээр эл асуудал ард хоцров. Тодруулбал, лабораторийн аргаар уурагжуулж амилуулсан, маш нарийн ширхэгтэй бэлэн бэлдэц бүхий үсийг хөмсгөнд суулгаж эхэлсэн байна. Тухайн уураг үсийг суулгахад хавдах, хөхрөх зэрэг сөрөг нөлөөгүй, мөн ямар ч эрсдэлгүй гэдгээрээ онцлог, давуу талтай аж. Тухайлбал, уураг үсийг хөмсгөнд суулгасны дараа ургадаггүй учраас бүдүүрч, хэлбэрээ алдахгүй, мөн шивээс биш учраас өнгө алдахгүй, үсний уутанцаргүй, цавуугүй гэх мэт давуу талыг нэрлэж байлаа.

Уураг үсийг параллель бэхэлгээний технологи ашиглан зүүгээр, 3D зураглалаар хөмсөг шилжүүлэн суулгах зарчмуудтай хослуулан хийдэг бөгөөд ингэснээр 5-10 жилийн тогтоцтой, төрөлхийн мэт болдог байна.

М.Отгонцэцэг: Гоо сайхны салбарын хөгжил, шинэчлэлтээс хоцрохгүйг хичээдэг

Өндөр хөгжилтэй улс орнуудын гоо сайханчид лабораторийн аргаар уурагжуулж амилуулсан бэлэн бэлдэц буюу уураг үсийг хөмсгөнд суулгах шийдлийг түгээмэл ашиглаж эхэлжээ.  Олон улсад хүлээн зөвшөө­рөгдсөн, баталгаатай үйлчилгээг тус салон Монголынхоо гоо сайхны салбарт анх удаа нэвтрүүлсэн нь энэ юм.

Олон улсын түвшинд гоо сайхны салбар зургаан сар тутамд шинэчлэгддэг тул энэхүү дэвшилтэт шинэчлэлтээс хоцрохгүй, хөл нийлүүлэн алхахыг хичээдэг гэдгээ "Tenger bella beauty" гоо сайхны салоны захирал М.Отгонцэцэг онцоллоо. Мөн тэрбээр үйлчлүүлэгчдийнхээ хүсэлтээр БНСУ-ыг зорьж, хөмсгөнд уураг үс суулгах үйлчилгээ үзүүлэхийн зэрэгцээ салбарынхаа шинэчлэлээс туршлага судлах гэж буйгаа хуваалцлаа. Тэрбээр “Олон улсад гоо сайхны ямар нэгэн төрлийн үйлчилгээг нэвтрүүлэхэд тодорхой хугацаа шаарддаг клиник судалгаа зэрэг хэд хэдэн шат дамжлагаар баталгаажсаны дараа хүн дээр хийж эхэлдэг. Хөмсгөнд одоо суулгаж буй уурагжуулсан үс судалгааны шатаа давж, олон улсад хүлээн зөвшөөрөгдсөн тул бид энэхүү үйлчилгээг нэвтрүүлээд байна. Бүсгүйчүүд маань хөмсөгний энэ шийдэл шиг сормуус суулгах уу гэж их асууж байгаа. Сормуус клиник судалгааны түвшинд явж байгаа юм билээ. Хэрэв судалгааны шатаа давж баталгаажсан тохиолдолд энэ төрлийн үйлчилгээг нэвтрүүлэх төлөвлөгөөтэй байгаа” гэв.

Уураг үс суулгасан хүмүүсийн анхаарах зүйл

Хөмсгөндөө уураг үс суулгуулсан хүмүүс долоо хоногоос нэг сарын хугацаанд тодорхой гам дэглэм барих ёстойг анхааруулж, арьс цочроох төрлийн хүнсний болон гоо сайхны бүтээгдэхүүн хэрэглэхгүй байхыг мэргэжлийн хүмүүс зөвлөж байна. Тухайлбал, үс суулгасан өдөр хөмсөгтөө хүрч болохгүй, долоо хоногийн хугацаанд дасгал хийхгүй, хөлрөхгүй байх ёстой бол нэг сарын хугацаанд саунд орж, усанд сэлж болохгүй зэрэг дэглэм барихыг сануулав. Мөн ажил амралтаа зохицуулж, хангалттай нойр авахыг зөвлөж байлаа.

Өвдөлтгүй тураах аппарат

“Tenger bella beauty" салон арьс арчилгаа, эмчилгээний 90 гаруй төрлийн цогц үйлчилгээ үзүүлдэг бөгөөд тэдгээр нь мэсгүй гэдгээрээ онцлогтой. Тус салон эдгээр үйлчилгээгээ олон улсын гоо сайхны салбарын хөгжил, дэвшилтэй уялдуулан шинэчилж, сайжруулалт хийдэгт үйлчлүүлэгчид нь ам сайтай байлаа. Тухайлбал, целлюлит задлан эрүүлжүүлж, галбиржуулан тураах үйлчилгээндээ дэвшилтэт шинэ технологи нэвтрүүлжээ. Ингэснээр бүх насныхан ямар ч өвдөлт мэдрэхгүйгээр турах бүрэн боломжтой болсон байна. Целлюлит задалж, тураах үйлчилгээнд хамрагдахад тухайн хүний бие, арьсны онцлогоос шалтгаалж, бие нь хөхрөх,  зарим хэсэгт нь өвчин ордог учраас шантарч, курс эмчилгээгээ дуусгахгүй дундаас нь орхих тохиолдол гардаг байна. Тэгвэл энэ төрлийн үйлчилгээндээ шинэ технологи нэвтрүүлснээр үйлчлүүлэгчид нь хөхрөх, өвдөх гэдэг үгийг мартжээ.

Целлюлит задлан эрүүлжүүлж, галбиржуулан тураах үйлчилгээнд арав хоног ороход курс эмчилгээ болдог бөгөөд эхний оролтоор л үр дүн гарч эхэлдэг гэдгийг нэгэн үйлчлүүлэгч тодотгож байлаа. Тус салоны ашиглаж буй тураах аппарат буюу эко тюнин дотроос нь эрүүлжүүлж, тураадаг гэдгээрээ онцлогтой аж. Тухайлбал, цусны эргэлтийг сайжруулж, бодисын солилцоог эрчимжүүлж, булчин суллаж, хүйтэн арилгаж, хаван буулгаж, өтгөн хаталтыг арилгадаг байна. Мөн дотор эрхтний үйл ажиллагааг сайжруулан өндгөвч, түрүү булчирхайн үйл ажиллагааг ч дэмждэг аж.

Үүдэл эсийн гайхамшиг

Дэлхий нийтэд үүдэл эсийн технологи хурдтай хөгжиж, гоо сайханд эрчимтэй ашигладаг болоод буй. Учир нь үүдэл эсийн технологи ашиглан хүний залуу эсийн тоог нэмдэг байна. Залуу эсийн тоо нэмэгдсэнээр арьсны сэвх, нөсөө толбо бүдгэрч, арьс өнгөлөг толигор болж, залууждаг байна. Тийм учраас сүүлийн үед үүдэл эсийг гоо сайханд эрчимтэй ашигладаг болжээ.

“Tenger bella beauty" салоны санал болгодог үүдэл эс шингээх үйлчилгээ буюу Skin Booster нь эхийн хүйн цусны үүдэл эсийг хамгийн өндөр буюу 660.000 РРМ  тунгаар агуулдаг байна. Тиймээс арьсыг нөхөн сэргээж, гэрэлтүүлсэн, өнгөлөг, толигор болгож, чийг тэжээлээр хангаж, уян хатан чанарыг нь нэмэгдүүлж, улмаар арьсыг чангалахаас гадна эрүүл мэнд талдаа мөн эерэг нөлөө үзүүлдэг гэдгийг тус салоны захирал хэллээ. Тэрбээр “Хүн нас нэмэх тусам залуу эсийнх нь тоо багасаж, хөгширч эхэлдэг. Тиймээс үүдэл эсээр дамжуулан хүний залуу эсийг нэмдэг. Залуу эсийн тоо нэмэгдэхээр хүн залуужиж, удаан хөгширдөг. Мөн үүдэл эсийг мэдрэлийн цэгүүд дээр хийдэг учраас сонсгол сайжирч, толгой тархины өвдөлт  арилдаг. Цар тахлын дараа хүмүүст түгээмэл илэрч буй мартаж санадаг асуудалд ч эерэг өөрчлөлт гарч байгаа. Үүдэл эсийг жирэмсэн хүн ч хийлгэж болдгоороо онцлог, давуу талтай” гэв.

Эхийн хүйн цусны үүдэл эс бусад ижил төрлийн бүтээгдэхүүнд ойролцоогоор 50.000 PРМ агуулагддаг бол тус салоны Skin Booster бүтээгдэхүүн  нь үүнээс 12 дахин их агуулдгаараа онцлогтой аж. Мөн арав орчим төрлийн мульти пептидийн комплекс, гиалуроны хүчил, олон пептид глутатион агуулдаг тул арьсны давхарга бүрд тэжээл өгч, мөн үүдэл эсийн үйлчлэлийг дэмжиж, илүү хүчтэй нөлөө үзүүлдэг байна.

С.Юмсүрэн

 Эх сурвалж: Монголын үнэн сонин №002/24629/