Аваргыг давж аварга болдог

-Гавьяат тамирчин М.Анхцэцэгийн тогтоосон амжилтыг олон улсын хэмжээний мастер О.Төгс-Эрдэнэ шинэчиллээ-

Дотоодод болж буй уралдаан тэмцээний үйл ажиллагааг шинэчлэх зорилгоор Холбоодын нэгдсэн улсын аварга шалгаруулах тэмцээнийг зохион байгуулах болсон. Монголын спортын корпорацаас санаачилсан спорт холбоодын нэгдсэн тэмцээн дөрвөн жилийн өмнөөс эхлэлтэй бөгөөд энэ удаад өргөн бүрэлдэхүүнтэйгээр үргэлжилж байна. Спортын 14 төрлөөр 1400 гаруй тамирчин оролцохоор мэдүүлгээ өгсөн уг тэмцээний хүндийн өргөлтийн аваргууд саяхан тодорлоо. Эрэгтэйчүүдийн 71, эмэгтэйчүүдийн 28 дахь удаагийн улсын аварга шалгаруулах тэмцээнд 100 гаруй тамирчин 10 жинд өрсөлдсөн юм. Тэмцээнд оролцсон нийт 24 байгууллагаас “Алдар” спорт хорооны хүндийн өргөлтийн тамирчид багийн дүнгээр тэргүүллээ. Түүнчлэн эрэгтэй, эмэгтэй багийн дүнгээр тус спорт хорооныхон манлайлжээ. Жингийнхээ дээд амжилтыг эзэмшдэг тамирчид үзүүлэлтээ нэмсэн, харууштай болсон энэ жилийн улсын аварга шалгаруулах тэмцээнээс +81 кг-ынх олон нийтийн анхаарлыг ихэд татаж байв. Учир нь, энэ жинд Монгол Улсын Гавьяат тамиирчин М.Анхцэцэг өрсөлддөг бөгөөд түүний зодог тайлахаа мэдэгдсэнээс хойших анхны тэмцээн болохоор үзэгчид сонирхон “чих тавих” шалтгаан болсон байх. Хүндийг өргөлтийн спортыг шимтэн үздэг хүмүүст олзуурхууштай үйл явдал болсон нь М.Анхцэцэг Холбоодын нэгдсэн улсын аварга шалгаруулах тэмцээнд өрсөлдлөө. Дотоодын өрсөлдөөнийг нэмэгдүүлж, залуу тамирчдад туршлагаасаа хуваалцах түүний энэхүү шийдвэр “нүдээ олсон” гэхэд болно. Гавьяатын хувьд түлхэлттэй эхний өргөлтөө амжилттай гүйцэтгэсний дараа алтан медаль хүртэх нь тодорхой болсон учраас дараагийн өргөлтүүдээ гүйцэтгээгүй юм. Алтан медалийн тавцанд зогссон тэрбээр олон улсын тэмцээнд дахин өрсөлдөхгүй, хааяахан дотоодын тэмцээнд оролцохоо хэлж, ирээдүйн аваргуудад туслах хүсэлтэйгээ дурдлаа. Энэ зорилгынхоо хүрээнд өөрийн нэрэмжит шагналтныг тодруулсан нь ихэд бэлгэшээлтэй санагдаж байв. Гавьяат тамирчин М.Анхцэцэгийн нэрэмжит “Алтан бүс” шагналыг олон улсын хэмжээний мастер О.Төгс-Эрдэнэ гардан авлаа. О.Төгс-Эрдэнэ энэ удаагийн тэмцээний үеэр огцмоор 105 кг-ыг өргөж түүний 2020 онд тогтоож байсан дээд амжилтыг шинэчлэн тогтоосон юм. 81 кг-ын жинд өрсөлддөг түүний хувьд дээрх амжилтаараа улсын аварга шалгаруулах тэмцээнээс зургаа дахь алтан медалиа авлаа. Дэлхийн аварга шалгаруулах тэмцээний хүрэл, өсвөр, залуучуудын тивийн аваргаас алтан медальтай О.Төгс-Эрдэнэ насан хүрэгчдийн  Азийн аварга шалгаруулах тэмцээнээс мөн хүрэл медаль хүртэж байсан тамирчин юм. 2015 оноос хүндийн өргөлтийн спортоор хичээллэж удаах жил нь улсын аварга шалгаруулах тэмцээний медалийн тавцанд зогссон нь түүний хувьд эхлэл байв. Өдгөө Гавьяат дасгалжуулагч Ц.Хосбаяр, Ц.Батзаяа нарын удирдлагад бэлтгэлээ базаан улсынхаа нэрийн өмнөөс олон улсын тэмцээнд оролцож байгаа түүнийг хүндийн өргөлтийн спортоор хичээллэх зориг өгсөн хүн нь Монгол Улсын Гавьяат тамирчин М.Анхцэцэг ажээ.  Холбоодын нэгдсэн улсын аварга шалгаруулах тэмцээний хүндийн өргөлтийн эмэгтэйчүүдийн 81 кг-ын жингийн мөнгөн медалийг Г.Болортуяа зүүлээ. Тэрбээр сүүлийн дөрвөн жил улсын аваргад үзүүрлэж байна. Энэ жингийн хүрэл медалийн  эзэн болсон “Ээрмэл-1” клубийн тамирчин О.Оюунжаргалын хувьд нийлбэр дүнгээр 194 кг өргөж, спортын мастерын болзол биелүүллээ. Ийнхүү онцлох зүйл олонтой, үзүүштэй тэмцээнийг хүндийн өргөлтийнхөн харууллаа. Харин холбоодын нэгдсэн тэмцээн спортын бусад төрлөөр үргэлжилж байна. Жилийн  эхэнд зохион байгуулдаг улсын аварга шалгаруулах тэмцээнээс аль спорт холбооны хэн гэдэг тамирчин өнгөтэй, бэлтгэлтэй байгаа нь харагддаг. Тэдгээрээс ирэх саруудад болох тэмцээн уралдаанд оролцох тамирчдын ерөнхий үзүүлэлт гарч дасгалжуулагч нар ажилдаа ордог билээ.   

 Б.Сэлэнгэ

 Эх сурвалж: Монголын үнэн сонин №002/24629/