Ногоон машинаас “төрсөн” үзэмж брэнд

Монгол үндэсний уламжлалт баяр Цагаан сар айсуй. Бүх нийтээр өргөн дэлгэр тэмдэглэн өнгөрүүлдэг энэхүү баяраар монголчууд бид үндэснийхээ дээл хувцсаа өмсөж гангардаг. Сүүлийн үед гэр бүл, найз нөхөд, хосууд өнгө, загвар ижилсүүлж гоёдог болсон. Цагаан сар тохиоход сар гаруй хугацаа байгаа хэдий ч хүмүүс, ялангуяа бүсгүйчүүд маань баярынхаа гангарааны эрэлд гарчээ.  Тиймээс уншигч та бүхнийхээ цаг завыг хэмнэх үүднээс “Бүтээлч Монгол” буландаа “Үзэмж” монгол брэндийг үүсгэн байгуулагч жүжигчин, дизайнер С.Энхзаяаг онцлон танилцуулж байна.

ӨНГӨ, ЗАГВАРЫН ӨРГӨН СОНГОЛТ

 “Үзэмж” брэнд үйлчлүүлэгч нарынхаа хүссэн материал, өнгө, загварын дагуу  захиалгаар урлахаас гадна дэлгүүртээ өргөн сонголттой бэлэн худалдаалж буйгаараа онцлог, давуу талтай. Тиймээс бид тус брэндийн дэлгүүрийг зорилоо.

Нэрнээсээ л гоё сайхан, тансаг зэрэглэлийг мэдрүүлсэн тус брэндийн дэлгүүрээр зочлоход бодол төсөөлөл маань бодит байдлаас огт зөрсөнгүй. Үнэхээр л өнгө, загварын өргөн сонголт угтав. Зэрэгц команд авсан мэт эгнэх маникануудын дээл ёстой хараа булааж, шунал хөдөлгөм харагдаж байлаа.

“Ногоон хурганы арьс, нохойн битүү туурайнаас бусад нь байна” гэдэг шиг өнгө, загвар, размерын өргөн сонголт угтсан юм. Нэг өнгөн дээр гэхэд л 3-4 төрлийн загварын сонголт байх нь тэр. Жишээлбэл, сүүлийн үед тренд болоод буй мандала хээтэй торгоор нударгатай, нударгагүй, мөртэй, мөргүй, энгийн болон дэрвэгэр хормойтой, хоёр эсвэл гурван эмжээртэй зэрэг сонголт санал болгож байв. Мөн материалын хувьд ч сонголт арвин. Энгийн даавуун дээлээс өгсүүлээд хүр хорхойн торгон дээл ч харагдаж байлаа. Өнгөний хувьд даруухан бүдгээс эхлээд тод, хурц өнгөнүүд ч багтаж байв. Түүн дотор энэ жил тренд болоод буй хүрэн улаан өнгөтэй дээл болон зах, эмжээр, нударга зэргээр аль нэг хэсэгт нь энэ төрлийн өнгө орсон загварууд зонхилж байлаа.

ЭВДЭГЧ БА БҮТЭЭГЧ

“Монгол брэндээр дэлхийд гоёно” уриатай “Үзэмж” брэндийг үүсгэн байгуулагч, дизайнер С.Энхзаяа хувцас загварын ертөнцөд 2017 онд хөл тавьж, анхныхаа бүтээлийг өлгийдөн авч байжээ. Улмаар брэндээ 2019 онд албан ёсоор  баталгаажуулснаар хувцас загварын ертөнцөд эргэлт буцалтгүй ороод буй нь энэ.  Гурван үе дамжин өвлөгдсөн ногоон машин болон шинийг эрэлхийлэгч зан нь түүнийг дизайнер болгожээ. Тэр нийтлэг, нэгэн хэвийн зүйлд дургүй учраас бага байхдаа хувцсаа дандаа эвдэж, өөрчилж өмсдөг байж. Халаасгүй бол халаас оёж, ханцуйгүй бол ханцуй залгаж, даашинзынхаа хормойг шулуун, дэрвэгэр, богино, урт болгох зэргээр төрөл бүрийн загвартай болгож өмсдөг байсан тухайгаа дурслаа. Энэ л үеэс дизайнер болох суурь тавигдаж, өдгөө ийнхүү “Үзэмж” брэндийг өлгийдөн авч, өсгөн бойжуулсаар...

“Үзэмж” брэнд материал, эмжээр, захны хэлбэр, мөр болон оёдол хийцээрээ бусдаас содон тул үүгээрээ ялгардаг байна. Учир нь, динзайнер С.Энхзаяа материал сонгохдоо нэлээд ач холбогдол өгдөг гэнэ. Тухайн материал нүдэнд гоё харагдахаас илүүтэй хамгийн гол нь хүний биед тухтай, эрүүл мэндэд сөрөг нөлөөгүй байх шаардлагатай учраас даавуун утастай, амьсгалдаг материал сонгодог байна. Мөн үйлчлүүлэгч нар “Надад ямар өнгийн аль загварын дээл зохих бол” гэж түгээмэл асуудаг учраас өнгөний талаар нарийвчлан судалж, мөн худалдааны зөвлөхөө энэ чиглэлд мэргэшүүлэхэд илүү анхаарч эхэлжээ. Тэр жүжигчин мэргэжилтэй хэдий ч загвар зохион бүтээх хүсэл сонирхол нь дийлж, хожим хувцас загварын чиглэлээр мэргэшин динзайнер болж загварын салбартай хувь заяагаа холбоод буй. Анхны бүтээлээ халаастай бөгөөд даашинз шиг дэрвэгэр хормойтой урлан урд хөршид зохион байгуулсан үзэсгэлэн худалдаанд тухайн загвараа дэлгэж, улмаар худалдан борлуулснаар бизнесийн гараагаа эхлүүлсэн байна.  

АЖИЛТНААС АЖИЛ ОЛГОГЧ БОЛСОН НЬ

Найман жилийн өмнө гэрийнхээ нэг буланд үе дамжсан ногоон машинаа байрлуулан тэндээ бүтээлийнхээ загварыг гаргах, эсгэх, оёх зэрэг бүх шат дамжлагыг өөрөө хийж гүйцэтгэдэг ажилтан байсан бол өдгөө ажил олгогч болжээ. Тодотговол, өөрийн гэсэн дэлгүүр, бас урлантай болж өргөжиж чадсан байна. Тэрбээр худалдааны зөвлөх, эсгүүрчин, оёдолчин гээд арав гаруй хүнийг ажлын байраар хангаж байгаа бөгөөд ингэхдээ тэднийхээ ажил, амьдралынх нь тэнцвэрт байдлыг алдагдуулахгүйн тулд цагийн уян хатан зохицуулалт хийж ажиллуулдаг тухай сонсоход эмэгтэй удирдагч, ээж, эхнэр хүний үүрэг хариуцлага мэдрэгдэж байв.

Өөдлөх айл үүднээсээ гэдэг. Ёстой л ажлынхаа шат дамжлага, эд эс бүхэнд сэтгэлээ шингээдгийг түүний яриа илтгэж, дэлгүүрийнх нь өнгө төрх,  борлуулалтынх нь шийдэл тодотгож байлаа. “Энэ дээл ямар гоё юм бэ. Даанч жоохон уртдаад байх юм” гэж үйлчлүүлэгч нараа сэтгэл гонсгор гаргахгүйн тулд дэлгүүртээ оёдлын машин байрлуулан урт, өргөнөөс нь хүссэн хэмжээгээр хасаж өгөх үйлчилгээг үзүүлж байв. Мөн дээлээ хадгалж буй, маниканд өмсгөж, өлгүүрт өлгөсөн байдлаас нь түүний эмх цэгцтэй, нягт нямбай зан чанар тодхон харагдаж байсан юм.

МӨРӨӨДӨЛ БА ГОЁЛЫН ТАЙЗ

Монголын хувцас загварын хамгийн том наадам бол Гоёл” наадам байдаг. Хувцас загварын салбарт өөрийн өнгө төрхийг бүтээж, уран сэтгэмж, ур чадвараараа урласан бүтээлээ “Гоёл” наадамд сойх нь загвар зохион бүтээгчдийн нэг хүсэл мөрөөдөл байдаг болов уу. Үүний нэгэн адил “Үзэмж” брэндийг үүсгэн байгуулагч, дизайнер С.Энхзаяа өөрийн мэдрэмж, ур ухаанаас ургасан бүтээлээ “Гоёл” наадамд хоёр ч удаа сойжээ. Тодруулбал, 2024, 2025 оны “Гоёл” наадамд тусгайлан урласан бүтээлээрээ өрсөлдөж финалд шалгаран, хүсэл мөрөөдөлдөө нэг алхам ойртож чаджээ.

Түүний хүсэл мөрөөдөл бол Монгол буюу “Үзэмж” брэндээр дэлхийд гоёх. Энэхүү том мөрөөдлийнхөө төлөө төдийгөөс өдий хүртэл тууштай зүтгэж яваа түүнийг “Гоёл” наадмын тайзан дээр амилуулсан бүтээлүүд нь бүрэн дүүрэн илэрхийлж, дотоод ертөнцийг ил гарган харуулж байгаа гэдгийг хэлж байлаа. Тэрбээр “Аливаа тэмцээн уралдаанд түрүүлэх бус оролцох нь чухал байдаг. Шинэ зүйлд суралцах, туршлага хуримтлуулах, өөрийгөө өөр өнцгөөс олж харах, сорих боломж олгодог. Энэ утгаараа манай хамт олон хоёр жил дараалан “Гоёл” наадамд өөрсдийн хэмжээнд амжилттай оролцсон гэж бодож байгаа. Би өөрийнхөө бүтээлд сэтгэл ханадаггүй, үүнийг ингэх байж, тэрийг нь тэгэх байж гэж чамлаж, дараа дараагийн удаад сайжруулахыг хичээдэг. Ер нь Монгол дээлийг ямар ч төрлийн материал, өнгөөр хүссэн загвараар урлаж болно. Гэхдээ дээлийн хамгийн гол чухал хэсэг бол монгол үндэсний хувцас гэдэг утгаараа энгэр болон зах байдаг. Тиймээс дээлийн энгэр, захны үндсэн хэв маягийг алдагдуулж болохгүй. Загвараа зохион бүтээхдээ би энэ зарчмыг баримталдаг. Харин хормой, ханцуй зэрэг бусад хэсэг дээр мэдрэмжээрээ “тоглолт” хийдэг. Ингэхдээ захиалагчийнхаа хүсэлд тулгуурлан өөрийн өнгө төрхийг шигтгэж бүтээлээ урладаг” хэмээгээд тун удахгүй өөрийн бүтээлээр дагнасан загварын шоу зохион байгуулахаар бэлтгэл ажлаа базааж эхэлсэн тухайгаа энэ ташрамд хуваалцсан юм. 

“Үзэмж” брэндийн олон өнгө, загварын өргөн сонголт дунд төөрч будилахвий гэж санаа зовох шаардлагагүй. Учир нь, дэлгүүрийн худалдааны зөвлөх таны царайны өнгө, биеийн онцлогт тохирсон, давуу талыг илүү тодотгож харуулах зохимж төгс дээлийг сонгоход зөвлөн туслах үйлчилгээг бүрэн дүүрэн үзүүлнэ. Хэрэв таны авахыг хүссэн дээл тань урт эсвэл өргөн байвал тэр даруйдаа хасуулаад авах боломжтой. Мөн хүсвэл сонгосон дээлэн дээрээ тохирох бүс, малгай, тэр ч бүү хэл ээмэг, толгойн гоёлоо ч сонгон худалдан авч болно. Ингэж үйлчлүүлэгчээ шинэ гоёлтой, сэтгэл хангалуун, эргэн ирэх итгэл дүүрэн үдэх боломжийг тэд ийнхүү цогцоор нь бүрдүүлж чаджээ.

НЭРИЙН ХУУДАС
Хуудас: Үзэмж Монгол Брэнд Uzemj brand
Хаяг: “Гранд плaзa”
602 тоот дэлгүүр
Утас: 80290102
91914676

С.Юмсүрэн

 Эх сурвалж: Монголын үнэн сонин №003/24630/