Беларусь улсад Ерөнхийлөгчийн сонгууль болж, Александр Лукашенко сонгогдлоо. Тэрбээр улс орноо 1994 оноос хойш удирдаж байгаа. Сонгогчдын 87.6 хувь нь түүний төлөө саналаа өгчээ. Сонгуулийн төв хорооны мэдээлснээр сонгуулийн ирц 85.7 хувьтай байв. Европын парламент, Европын холбооны хэд хэдэн орон, АНУ сонгуулийн үр дүнг хүлээн зөвшөөрөхгүй гэдгээ мэдэгдсэн. ОХУ-ын Ерөнхийлөгч Владимир Путиний ойрын холбоотон гэгддэг түүнийг барууны хэвлэлүүд “Европын сүүлчийн дарангуйлагч” хэмээн хочилдог. Александр Лукашенко 2024 онд улс төрийн хэргээр ял шийтгүүлсэн 293 хүнийг хэд хэдэн үе шаттайгаар өршөөсөн.
Энэ удаагийн сонгуульд түүнтэй өрсөлдөхөөр дөрвөн нэр дэвшигч бүртгүүлсний нэг нь Либерал ардчилсан намын дарга Олег Гайдукевич юм. Мөн Коммунист намын Төв хорооны нэгдүгээр нарийн бичгийн дарга Сергей Сиранков саналын хуудсанд багтжээ. 2020 оны Ерөнхийлөгчийн сонгуульд өрсөлдсөн парламентын гишүүн асан Анна Канапатская, Бүгд найрамдах хөдөлмөрийн намын дарга Александр Хижняк нар ч даагаа нэхжээ.
Эх сурвалж: Монголын үнэн сонин №004/24631/
°C
Сэтгэгдэл (0)
Сэтгэгдэл бичигдээгүй байна