Хүүхдүүд өвлийн спортоор өрсөлдөж байна

Монголын хүүхдийн өвлийн спортын VIII наадмыг энэ сарын 17-24-нд зохион байгуулж байна.  Өвлийн спортыг хөгжүүлэх, ирээдүйн шилдэг тамирчдыг нээн илрүүлэх, өсвөр үеийнхэнд эрүүл, идэвхтэй амьдралын хэв маягийг төлөвшүүлэх зорилгоор тус наадмыг хоёр жил тутам зохион байгуулдаг уламжлалтай. Энэ удаагийн наадмыг “Мөрөөдлийнхөө төлөө шударгаар өрсөлдье” уриан дор зохион байгуулж буй бөгөөд найман төрөлд 546 өсвөрийн тамирчин 478 медалийн төлөө хурд, авхаалж самбаагаа сорих юм. Хандгайт дахь мөсөн гулгуурын талбайд болсон нээлтийн ёслолд  ССАЖЗЯ-ны Төрийн захиргааны удирдлагын газрын дарга Ч.Энх-Амгалан, Биеийн тамир, спортын улсын хорооны дарга О.Баттулга, МТХ-ны ерөнхийлөгч Д.Болормаа тэргүүтэй хүндэт зочид оролцсон. БТСУХ-ны дарга О.Баттулга хэлсэн үгэндээ “Орон нутгаасаа шалгарсан шилдгийн шилдэг тамирчин Та бүхэнд онцгойлон баяр хүргэж, өвлийн спортын сурталчлах, өсвөрийн тамирчдын ур чадварыг дээшлүүлэх, тив, дэлхийн тэмцээнд өрсөлдөх тамирчдыг нээн илрүүлэх зорилготой”-г тэмдэглэлээ. Мөн ССАЖЗЯ-ны Төрийн захиргааны удирдлагын газрын дарга Ч.Энх-Амгалан хэлсэн үгэндээ “Монгол Улсын Засгийн газар, ССАЖЗЯ-наас нийтийн биеийн тамирыг хөгжүүлэх, мэргэжлийн спорт, үндэсний спорт, өндөр зэрэглэлийн спорт, өвлийн спортын чиглэлийн стератеги төлөвлөгөөг гаргаж, ирэх дөрвөн жилд, цаашлаад найман жилийн хугацаанд Монголын спортын салбарыг дэлхийн төвшинд гаргах томоохон ажил эхэлж байгааг дуулгахад таатай байна” хэмээн тодотголоо. Монголын хүүхдийн спортын өвлийн VIII наадамд амжилттай оролцож, медаль хүртсэн тамирчид Засгийн газрын 2018 оны 173 дугаар тогтоолын хоёрдугаар хавсралт “Үндэсний хэмжээний тэмцээн, наадамд амжилттай оролцож медаль хүртсэн тамирчин түүний дасгалжуулагчийг шагнаж урамшуулах, мөнгөн шагнал олгох журам”-ын 2.1 дэх заалтыг үндэслэн олгоно. Тодруулбал, алтан медалийг 600 мянга, мөнгийг 400 мянга, хүрлийг 200 мянган төгрөг дагалдах бөгөөд наадмын нийт шагналын сан 190 сая байх аж. Наадамд гүйлтийн тэшүүр, шорт трейк, снөүбоард, уулын цана, шайбтай хоккей, гүйлтийн цана, тусгай олимпын цасны гуталтай гүйлт гэсэн үндсэн долоон төрөлд өрсөлдөөн өрнөх бол наадмын үзүүлэх төрөлд тусгай олимпын гүйлтийн цанын спорт багтсан юм. 

Наадмын тэмцээн уралдааны тухайд, Чингэлтэй дүүргийн Спорт цогцолборт шайбтай хоккей, Хандгайт дахь мөсөн гулгуурын талбайд гүйлтийн тэшүүр, шорт трейк, Орхон аймгийн “Сархиа” цанын баазад уулын цана, гүйлтийн цана, снөүбоард, цасны гуталтай гүйлтийн тэмцээн зохион байгуулахаар төлөвлөжээ.