ОХУ, АНУ-ын төлөөлөгчид Украинтай холбоотой асуудлаар анхны хэлэлцээрээ Саудын Арабт хийлээ. Эр-Рияд хотноо болсон хэлэлцээнд ОХУ-ын талыг Гадаад хэргийн сайд Сергей Лавров Америкийн төлөөлөгчдийг Төрийн нарийн бичгийн дарга Марко Рубио ахлан оролцжээ. ОХУ 2022 оны хоёрдугаар сараас хойш Вашингтоны эрх баригчидтай өргөн хүрээний уулзалт хийгээгүй учир дипломат амжилт боллоо. АНУ-ын хувьд ОХУ Украины дайныг нэг өдрийн дотор биш гэхэд ойрын хугацаанд дуусгахыг хүсч буй Дональд Трампын сонгуулийн амлалтаа биелүүлэх алхам юм. “Fox News” агентлаг дайныг зогсоох төлөвлөгөө нь харилцан гал зогсоох, Украины Ерөнхийлөгчийн сонгууль, дараа нь энхийн гэрээнд гарын үсэг зурах гэсэн гурван хэсгээс бүрдэнэ гэж мэдэгдсэн. Трампын засаг захиргаа Европын оролцоогүйгээр Москватай хэлэлцээ хийхээр зарлахад Европын удирдагчид Парист яаралтай цугласан. Уулзалтын дараа тодорхой шийдвэр гаргаагүй ч Европын холбоо болон НАТО батлан хамгаалах хөрөнгө оруулалтаа нэмж, Киевт аюулгүй байдлын найдвартай баталгаа өгөхөө мэдэгдсэн. АНУ-ын Ерөнхийлөгч Доналд Трамп ОХУ-ын удирдагч Владимир Путинтэй Украины мөргөлдөөнийг зогсоох талаар Саудын Арабт хэлэлцэж магадгүй гэсэн мэдээ энэ сард гарсан. Вашингтон дахь Ойрхи Дорнодын хүрээлэнгийн дэд тэргүүн Пол Салем “Саудын Араб бол төвийг сахисан газар учраас Трамп, Путин хоёрын уулзах логик сонголт юм. Украины дайны талаар Европ хатуу байр суурьтай байгаа учир Европын аль нэг улсад уулзалт хийх боломжгүй. Уламжлал ёсоор ийм дээд хэмжээний уулзалтад Женев зэрэг төвийг сахисан газруудыг сонгож болох ч Москва Европын орнуудтай харилцаа муудсан учир энэ хувилбарыг сонгоогүй байх” гэжээ.
Эх сурвалж: Монголын үнэн сонин №007/24634/
°C
Сэтгэгдэл (0)
Сэтгэгдэл бичигдээгүй байна