Киев баталгаа, Европын оролцоог шаардлаа

АНУ, Украины төлөөлөгчид Саудын Арабт хэлэлцээр хийсэн нь олон улсын анхаарлын төвд байлаа. АНУ-ын Төрийн нарийн бичгийн дарга Марко Рубио, Украины Ерөнхийлөгчийн Тамгын газрын дарга Андрей Ермак тэргүүтэй өндөр түвшний төлөөлөгчид уулзсан. Киевийн тал 30 хоногийн гал зогсоох тухай АНУ-ын саналыг зөвшөөрсөн ч ОХУ мөн адил биелүүлэх нөхцөл тавьжээ. Үүний хариуд Вашингтон цэргийн хангамж, тагнуулын мэдээлэл солилцох ажиллагааг сэргээхээ амлалаа.  Жидда хотноо болсон хэлэлцээний дараа хамтарсан мэдэгдэл гаргасан.  Киев нэн даруй, ямар ч болзолгүйгээр гал зогсоохыг зөвшөөрсөн ч баталгаа шаардаж, Европын оролцоог чухалчилж байна. Украины Ерөнхийлөгч Владимир Зеленский “АНУ  Москваг ятгах ёстой” гэжээ.  Европ Вашингтоныг орлоход бэрх энэ нөхцөлд Д.Трампын төлөвлөгөөг зөвшөөрөхөөс өөр гарц В.Зеленскийд үлдээгүй бололтой. Энэ завсарлагыг Киев хэрхэн ашиглах нь сонин.  АНУ-ын Ерөнхийлөгч Дональд Трамп Кремлийн тэргүүнтэй энэ сэдвээр  ярилцах төлөвлөгөөтэй байгаа.  Түүнд ОХУ-ын Ерөнхийлөгч ямар хариу өгөхийг таамаглахад бэрх. Владимир Путин Украинд гал зогсоож, энхийн хэлэлцээ хийхийг Киев болон Европын орнууд хүлээн зөвшөөрөх боломжгүйг илэрхийлжээ.  Кремлийн хэвлэлийн төлөөлөгч Дмитрий Песков “Блүүмберг”-т өгсөн ярилцлагадаа “ОХУ энх тайвны хүчин чармайлтад нээлттэй, дипломат арга замыг илүүд үзнэ” гэжээ. В.Путиний тохиролцоо нь Украины аюулгүй байдлыг урт хугацаанд хангах тогтвортой байдалд чиглэсэн хэлэлцээрийг эхлүүлнэ. Төлөөлөгчид гал зогсоох үед хүмүүнлэгийн хүчин чармайлт, тухайлбал дайнд олзлогдогсдыг солилцох, баривчлагдсан энгийн иргэдийг суллах, албадан дүрвэсэн украинчуудыг нутаг буцаах зэрэг асуудлыг хэлэлцжээ. “Ройтерс” агентлагийн мэдээлснээр, гал зогсоох дэглэмийг талууд харилцан тохиролцсоны үндсэнд сунгаж болно. Зарим эх сурвалжийн мэдээлж буйгаар Цагаан ордон “Украины ашигт малтмалын нөөцийг ашиглах тухай иж бүрэн хэлэлцээр”-ийг аль болох хурдан байгуулахаар тохиролцжээ. Украины нутаг дэвсгэрт гадаадын энхийг сахиулагчдыг нэвтрүүлэх санаачилга нь Киевийн дэглэмийг ард түмний уур хилэнгээс аврах гэсэн оролдлого мэт харагдаж  байгааг Оросын Гадаад хэргийн сайд өмнө нь мэдэгдсэн удаатай. Тодруулбал, “Энхийг сахиулагчид орос хэл, соёл, хэвлэл мэдээллийн хэрэгслийг устгаж, Үнэн алдартны сүмийг хориглосон Киевийн неонацист дэглэмийн үлдэгдлийг хамгаална” гэж Сергей Лавров мэдэгдсэн юм.

Эх сурвалж: Монголын үнэн сонин №009, 010/24636, 24637/