Хөвсгөл аймгийн Төмөрбулаг сумын МАН-ын хорооны дарга Т.Эрдэнэбаттай ярилцлаа.
-Сумаа танилцуулгаас яриагаа эхлэх үү?
-Хөвсгөл аймгийн Төмөрбулаг сум аймгийн төвөөс 75 километрт, баруун, баруун хойд талаараа өөрийн аймгийн Бүрэнтогтох сум, зүүн талаараа Тосонцэнгэл, Рашаант, Архангай аймгийн Цэцэрлэг, урд талаараа Галт, Шинэ-Идэр сумдтай хил залган оршдог. Би Төмөрбулаг сумын Монгол ардын намын хорооны даргаар ажилладаг хүн байна.
-Хөвсгөл аймгийн намын хороо Төмөрбулаг сумын намын хороог онцлон авч үздэгийн учир юу вэ?
-Манай намын хороо 1992 оноос хойш тогтмол үйл ажиллагаа явуулж сум орон нутагтаа болсон үе үеийн сонгуульд ялалт байгуулж оролцдог.Төмөрбулаг сумын намын хороо өөрийн хийж, хэрэгжүүлж буй ажлаараа тэргүүлж 2020 онд улсын шилдэг намын хороогоор, 2021 онд аймгийн шилдгийн шилдэг хороогоор шалгарсан.
Манай намын хорооны амжилтад энэ намыг түүчээлж ирсэн ахмадууд онцгой үүрэг оролцоотой гэж бид үздэг. Ахмадууд маань намын бүх үйл ажиллагаанд нь оролцож, залгамж халаагаа бэлдэх талаар анхаарч ажилладаг. Манай намын хороо ахмадын, залуучуудын, оюутны, эмэгтэйчүүдийн холбоо гэсэн төрийн бус байгууллагуудтайгаа нягтарч нэгдэж ажиллаж чаддаг нь үе үеийн сонгуульд ялалт байгуулах үндсэн суурь болдог.
-Үүрийн дарга нарын үүрэг оролцоо чухал биз?
-Баг, үүрийн дарга нарынхаа талаар дурдахгүй өнгөрч болохгүй. Манай намаас сонгогдсон багийн дарга үүрээ хариуцан ажилладаг. Багийн ажилд, намын үзэл бодлыг тусган хийж хэрэгжүүлж буй ажлаа уялдуулж энэ чиглэлээр нэгдэн нягтарч ажиллаж, багаараа аливаа ажилд оролцдог нь сонгуулийн удаа дараагийн ялалтад тус дэм болдог. Манай сумын хувьд энгийн байх үедээ ч намынхаа үзэл бодлыг тусгасан аливаа үйл ажиллагааг тогтмол зохиодог.
Залуучууд болон иргэдийнхээ дунд төрөл бүрийн спортын тоглоом наадам, тэмцээн уралдаан, аха тэмцээнийг бид тогтмол зохион байгуулж, үүр үүр дээр нь сурталчилж, оюуны болон соён гэгээрүүлэх ажлыг хийдэг. Манай намын хороо 1992 оноос хойш 2020 он хүртэл сонгуульд ялагдаж үзээгүй. Энэ нь урьд удирдаж байсан намын удирдлагууд болон намын дарга нар мөн одооны сумын дарга, сумын иргэдийн хурлын залгамж чанар алдагдаагүй, намынхаа үйл ажиллагааг ард иргэдэд сайн сурталчилж ажиллаж чадаж байгаагийн илрэл.
-Намын хороо гишүүдтэйгээ хэр тулж ажиллаж байна вэ?
-Намынхаа гишүүдийг дэмжих тал дээр намын хороо идэвх санаачилга гарган, аливаа төсөл, хөтөлбөрт нь дэмжлэг үзүүлж хамтран ажиллах, ард иргэдийнхээ өрхийн орлогыг нэмэгдүүлэх, ажлын байрыг нэмэх зорилт тавин ажилладаг. Манай сум үндсэндээ таван баг, таван үүр дээрээ 100 хувь цахимжиж 797 гишүүнээ цахим бүртгэлд хамруулж чадсан. 2016 оноос хойш гишүүд элсүүлэх ажил эрчимжиж, элсэх хүмүүсийн итгэл үнэмшил нэмэгдсэн. 2016 оноос хойш 2022 он хүртэл 320 гишүүнтэй болж гишүүнчлэлийн тоо 50-60 хувь нэмэгдсэн байна.
-Аймгаас сонгогдсон УИХ-ын гишүүн, бага хурлын гишүүдтэйгээ хамтарч хийсэн, шийдсэн ажлуудаасаа яриач?
-Бид аймгийн удирдлагууд УИХ-ын гишүүдтэйгээ маш нягтарч ажиллаж чаддаг. Ялангуяа сум, орон нутгийн хөрөнгө оруулалт дээр сум орон нутгийнхаа тулгамдсан асуудлыг шийддэг маань ард иргэдэд их таалагддаг. Манай сум газар тариалан эрхлэх боломжгүй. 2020 онд манай сумын хөдөөгийн Тээл баг дээр улсын төсвийн хөрөнгө оруулалтаар нарны сэргээгдэх эрчим хүчний цахилгаан станц баригдсан. Түүнийг түшиглэн иргэд өрхийн орлогоо нэмэгдүүлэх үйлдвэрлэл эрхлэх боломжтой болсон. Эрчим хүчээ түшиглээд сүү боловсруулах, малын гаралтай түүхий эд боловсруулах үйлдвэртэй болох санаачилгууд гарч байна. Сумын намын гишүүдтэйгээ байнгын уялдаа холбоотой байж, тэдний санал, хүсэлт, гомдлыг өөрийн эрх мэдлийн хэмжээнд орон нутагтаа шийдэж, хөрөнгө мөнгөтэй холбоотой асуудлыг шат дараатайгаар уламжилж байна.
-Төмөрбулаг сумын эдийн засгийн голлох эх үүсвэр юу вэ?
-Сумын ард иргэдийн маань үндсэн орлого, эх үүсвэр бол мал аж ахуй. Мал аж ахуй дотроо “Эрчмийн хар ямаа” гэдэг брэндийг 2017 оны арванхоёрдугаар сарын 17-нд бүртгүүлж гэрчилгээ авсан нь маш үр дүнтэй ажил болсон. Төмөрбулаг сум 208 мянган ямаатай, нэг жилд жараад тонн ноолуур гардаг. Энэ ашиг шимтэй “Эрчмийн хар ямаа” брэндээ олны танил болгохыг бид хүсэж, зорин ажиллаж байна. Малын үүлдэр угсаа сайжруулах талд бид амжилт гаргасан нь эндээс харагдана.
Трамп Төмөрөө
Эх сурвалж: Монголын үнэн сонин №046/24527/
°C