Нийслэлийн Онцгой байдлын газарт өнгөрсөн хоногийн хугацаанд цасанд суусан таван дуудлага, мэдээлэл бүртгэгджээ. Дуудлагын дагуу Налайх, Багануур, Багахангай дүүргийн Онцгой байдлын хэлтсийн алба хаагчид шуурхай үүрэг гүйцэтгэн, найман хүүхэд, 60 том хүнийг осгох, хөлдөх аюулаас авран хамгаалж, 10 автомашиныг цаснаас татан гаргасан байна.
Тухайлбал, Багануур дүүргийн хоёрдугаар хороо Нарийны ам хэмээх газарт их хэмжээний цас орсноос халтиргаа гулгаа үүссэн байна. Тухайн газарт портер болон приус-30 маркийн автомашинуудын шатахуун дуусаж, цасанд суусан, нялх хүүхэдтэй явж байна гэсэн дуудлага өгсөн байна. Онцгой байдлын албан хаагчид очиход 22-48 насны гурван том хүн, 0-13 насны таван хүүхэд осголтын байдалтай байсныг аюулгүй газар руу шуурхай тээвэрлэн хүргэжээ.
Багахангай дүүргийн нэгдүгээр хороонд автомашин цасанд суусан гэх дуудлагаар очиход Nissan Muso загварын автомашин цасанд суусан байдалтай 20-36 насны гурван иргэн, нэг настай хүүхэд байсныг автомашиныг татан гаргаж, аюулгүй байдлыг хангасан байна.
Түүнчлэн Төв аймгийн Эрдэнэ сумын мэргэн Таньюкийн хөшөөнөөс урагшаа зэвсгийн агуулахаас урд зүгт 1.2 км-т “Toyota aqua” загварын авто машин цасанд суусан, нялх хүүхэдтэй явж байна гэсэн дуудлагын дагуу очиход хоёр хүүхэд, гурван том хүн осголтын байдалтай байсныг аюулгүй байдлыг ханган, Налайх дүүрэг рүү зөөвөрлөжээ.
Төв аймгийн Эрдэнэ сумын Өвөр жанчивлангийн харалдаа хоёр автобус 100 иргэн цасанд суусан байна. Онцгой байдлын хэлтсийн бүрэлдэхүүнийг очиход Улаанбаатар хотоос Төв аймаг Эрдэнэ суманд байрлах Өвөр жанчивлангийн сувилал руу явж байсан суудлын автобустай 49 иргэн, Starex, Ниссан патрол, Ланд-200, Rx-350 автомашинууд цасанд суусан байсныг татан гаргаж, 49 иргэнийг тээвэрлэн сувиллын байрлалд хүргэж, аюулгүй байдлыг хангажээ.
Э.Сонор
°C