“Монголын үнэн” сонины Нэгдүгээр орлогч эрхлэгч Ганболдын Сонинбаяр МСНЭ-ийн “Ган үзэг-2022” оны тэргүүн наадмын “Сонины шилдэг редактор”-оор шалгарлаа. Г.Сонинбаяр нь нийтлэлийн бодлогын чанар чансааг сайжруулах, өөрчлөлт шинэчлэлтийг хийхэд редакцаа мэргэжлийн удирдлагаар ханган ажилласан юм. Тэрбээр “Улаанбаатар таймс”, “Үндэсний шуудан”, “Ардын эрх” зэрэг өдөр тутмын сонины албаны дарга, Хариуцлагатай нарийн бичгийн дарга, “Үндэстний тойм” сэтгүүлийн редакторын албыг тус тус хашиж байсан туршлагатай.
“Ган үзэг” наадмын шилдгүүдийг мэргэжлийн сэтгүүл зүйн үнэлэмжийг дээшлүүлэх зорилгоор Монголын сэтгүүлчдийн нэгдсэн эвлэлээс жил бүр шалгаруулдаг. Нэр дэвшсэн сэтгүүлч, байгууллагыг шалгаруулахдаа салбарын холбоод, экспертүүдийн санал дүгнэлтийг харгалзан үздэг. Энэ жил “Ган үзэг-2022” наадмын шилдэг телевизээр “Ийгл”, шилдэг сониноор “Өдрийн сонин”, шилдэг сэтгүүлээр “Үндэстний тойм”, шилдэг радиогоор “Шинэ долгион 107.5”, шилдэг мэдээллийн сайтаар www.ubn.mn, гэрэл зургийн шилдэг бүтээлээр “MPA.mn” агентлаг, орон нутгийн шилдэг хэвлэл мэдээллийн байгууллагаар Khuvsguliinungu.mn сайтыг тус тус шалгаруулжээ.
Х.Заяа
°C