Т.Доржханд: Түүхэн шийдвэр гаргах хаврын чуулган болно

УИХ-ын хаврын чуулган нээлтээ хийлээ. Хаврын чуулганы нээлттэй холбогдуулан УИХ-ын гишүүн, ХҮН-ын дарга Т.Доржханд сэтгүүлчдэд мэдээлэл хийв. Тэрбээр: 

-Хаврын чуулган нээлтээ хийлээ. Монгол Улсын түүхэн дэх хамгийн хүнд, эргэлтийн шийдвэр гаргах чуулган гэдгийг цохон тэмдэглэмээр байна. Яагаад гэвэл энэ чуулганаар Хөгжлийн банкны асуудал шийдэгдэнэ, хариуцлага тооцох асуудал яригдана. Нүүрсний түр хорооны нээлттэй хэлэлцүүлэг хийнэ. 

Энэ хаврын чуулганаар ядуу, хулгайтай 30 жилээрээ цаашаа хөгжих үү, тогтолцоогоо өөрчлөх үү гэдэг асуудал яригдана. Яагаад  гэвэл 2019 оны Үндсэн хуулийн нэмэлт, өөрчлөлтөөр ээлжит сонгуулиас нэг жилийн өмнө томоохон өөрчлөлт хийж болохгүй гэсэн заалт оруулсан. Суурь нь өөрчлөгдөхгүй тохиолдолд  бид хичнээн хариуцлага тооцоод, хэдэн нөхдийг шоронд явуулаад хэрэггүй. 

Тиймээс Монгол Улсын парламентын түүхэнд хамгийн хүнд хаврын чуулган эхэлж байна. Түүхэн шийдвэр гаргах хаврын чуулган болно. Үндсэн хуулийн нэмэлт, өөрчлөлт хийх үү гэдгийг Зөвлөлдөх санал асуулгад оролцогчдын 80 гаруй хувь нь дэмжсэн. Одоо цаашид засаглалын тогтолцоогоо зөв болгож чадах уу гэдэг хуваагдал дунд бид шийдвэрээ гаргах болоод байна. Бидний сонголт  бол ардчилалаа бэхжүүлэх ёстой хэмээв. 

Н.Энх