Тээврийн хэрэгслийн техникийн хяналтын үзлэг

Монгол Улсын Засгийн газар Дэлхийн банк болон Нордикийн хөгжлийн сангаас урт хугацааны хөнгөлөлттэй зээл авч “Тээвэр хөгжүүлэх” төслийн хүрээнд “Тээврийн хэрэгсэлд техникийн хяналтын үзлэг, оношилгоо хийх төвүүд байгуулах, бүртгэлийн нэгдсэн сүлжээ бий болгох” дэд төслийг 2001 оноос хэрэгжүүлж 2005 оноос техникийн хяналтын үзлэгийн төвүүд ажиллаж эхэлснээр техникийн хяналтын үзлэгийг тогтмол явуулах боломж бүрдсэн.

Монгол Улсын нутаг дэвсгэрт ашиглаж байгаа авто тээврийн хэрэгслийн техникийн байдал, хэрэглээний стандартын үзүүлэлтийг хангуулах, авто тээврийн хэрэгслээс хүн амын эрүүл мэнд, хүрээлэн буй орчинд үзүүлэх сөрөг үр дагаврыг бууруулах, замын хөдөлгөөний аюулгүй байдлыг хангах нөхцөлийг бүрдүүлэх зорилгоор авто тээврийн хэрэгсэлд техникийн хяналтын үзлэг явуулдаг.

Техникийн хяналтын үзлэгийн төв нь автомашин, түүний агрегат, зангилаа, системийн техникийн байдлыг шалгаж, техникийн хяналтын үзлэг хийхэд хэмжих, оношлох, шалгах, багаж хэрэгсэл, эсвэл шалгах ажлын технологийн дараалал нь харилцан адилгүй байж болох боловч дүгнэлт нь ижил нөхцөл шаардлагыг хангасан байна. 

Техникийн хяналт үзлэгийн төвүүд нь тээврийн хэрэгслийн ерөнхий байдал, иж бүрдэл, экологи, эргономикийн үзүүлэлт, тэнхлэг, жолооны механизм, тоормосны систем, гэрэлтүүлэг, хөдөлгүүр түүний системүүдийг холбогдох стандарт техникийн баримт бичгийн дагуу шалгаж үздэг бөгөөд  нэг тээврийн хэрэгслийг үзэх технологийн дундаж хугацаа 3.5-15 минут орчим байна.