Э.Даваанасан: Парисын олимпод оролцох эхний алхмаа хийж чадлаа

Турк улсын Станбул хотод болсон чөлөөт бөхийн олимпын эрх олгох сүүлийн тэмцээний эмэгтэйчүүдийн 76 кг-ын жинд Үндэсний шигшээ баг, “Алдар” спорт хорооны тамирчин, олон улсын хэмжээний мастер Э.Даваанасан уран мэхийг уралдуулж “Парис-2024” олимпын наадамд оролцох эрхээ авсан билээ. Түүнтэй уулзаж цөөн хором ярилцлаа.   

-Юуны түрүүнд “Парис-2024” зуны олимпын наадамд оролцох эрхтэй болсонд баяр хүргэе. Одоо урьд урьдынхаасаа илүү хичээж, бүх хүчээ дайчлах шаардлагатай боллоо?
-Баярлалаа. “Монголын үнэн” сонины уншигчдад энэ өдрийн мэнд хүргэе. Миний хувьд олимпын наадамд оролцох эхний алхмаа амжилттай хийлээ. Одоо дараагийн шат руугаа орж, алдаагаа засан, багш нартайгаа ажиллах болно. 
-Хэд хоногийн өмнө Станбулд болсон олимпын эрх олгох тэмцээний талаарх таны сэтгэгдлийг сонсъё. Эхлэл бол тун дажгүй байсан?
-Олимпын эрх олгох тэмцээнд богино хугацаанд оролцсон ч хурдан сэргэж чадсан. Энэ нь бэлтгэл, амралтаа тохируулж чадсаны үр дүн гэж бодож байна. Мөн багш нартайгаа сайн ойлголцож, өрсөлдөгчдөө сайн судалсны үр дүн юм. 
-Болгарын бөхтэй хийсэн барилдаанаа та ухрааж үзсэн үү. Энэ барилдааны дараа дэвжээнээс буухаас өмнө олон зүйлийн талаар тунгааж байгаа юм шиг ажиглагдсан?
-Би Болгарын бөхтэй өмнө нь барилдахдаа хожиж байсан. Саяын барилдаандаа ч хожих бүрэн боломжтой гэж харж байсан ч тактикийн алдаа гаргалаа.  
-Үүний дараа та богино хугацаанд сэргэлт авч сэтгэл зүйгээ бэлдэж гарч ирснээр нэмэлт барилдаан гаргаж чадлаа. Францын бөхтэй өмнө нь учраа таарч байв уу?
-Чухал барилдаанууд хүлээж байсан болохоор өмнөхийг нь орхихыг хичээсэн. Багш нар маань ч дараагийн барилдаандаа анхаар гэж зөвлөсөн.  
-Ялбал медаль, ялагдвал хоосон хоцордог учраас хүрэл медалийн төлөөх барилдааныг хийхэд амаргүй байдаг. Харин та өрсөлдөгчөө буулган авч чадлаа?        
-Үнэхээр амаргүй барилдаан байсан ч сэтгэл зүйгээ хүндрүүлэхийг хүсээгүй. Зөвхөн урдах барилдаандаа төвлөрч, анхаарсан. Үүний үр дүнд их тайван, барилдааны үеэр төвлөрч чадсан гэж бодож байна. 
-Олон жилийн өмнөөс зорьсон олимпын эрхээ биелүүлж, медалийн тавцанд зогссонд баяр хүргэе?
-Тамирчин бүрийн хамгийн том зорилго, мөрөөдөл олимпын наадамд оролцох байдаг. Зорилгодоо хүрэхэд нэг алхам урагшилсан болохоор одоо гол зүйл рүүгээ зүтгэх болно оо.
-Та 68 кг-аас эхлээд жин өгсөж одоо олимпын жинд хүч үзэж байна. Жингийн зөрүү мэдрэгдэх юм уу?
-Жингийн зөрүү маш их байдаг. 68, 72 кг-ын жинд барилдаж байсан болохоор хөдөлгөөн, хурд өөр байдаг юм билээ. Одоо бол жиндээ дасаж байна.  
-Энэ жил таны бэлтгэл жигд байгаа нь дотоод, гадаадын тэмцээнүүдээс харагдаж байлаа. Багш, дасгалжуулагчид тань таны бэлтгэлийн талаар ямар амтай байна вэ?
-Миний бэлтгэл жигд, сайн байгаа. Багш нартайгаа ойлголцоод ажиллаад явахад бүх зүйл их амар болдог юм.  
-Цаашдаа бэлтгэлийнхээ юунд илүү анхаарч ажиллах бодолтой байна вэ?
-Өрсөлдөгчдөө судална. Тэдэнд зориулсан барилдаан гаргаж, сургалтууд авах байх гэж бодож байна.
-Та Говь-Алтай аймгийн унаган хүүхэд. Бэлтгэлдээ орохоос өмнө нутаг ус руугаа явж ирэх бодолтой байна уу?
-Олимпын бэлтгэлээ нутагтаа хийх учраас их бэлгэшээж, баярлаж байна.

 Б.Сэлэнгэ

Эх сурвалж: Монголын үнэн сонин №020/24599/