Монголын хөлбөмбөгийн ногоон талбайд энэ сарын 11-нд манай улсын шигшээ Камбожийн багийг хүлээн авч тоглон 2:1-ээр хожлоо. Хоёр багийн эхний тоглолт долоо хоногийн өмнө Камбожийн Пномпень хотод болоход талбайн эзэн 2:0-ээр тоглолтыг гартаа авсан. Тэгвэл манай залуус өөрийн талбай дээрээ хариугаа авлаа. Ингэснээр Монголын шигшээ баг 2022 оны зургадугаар сарын 14-өөс хойш хожил аваагүй, 400 гаруй хоногийн хугацаанд өрсөлдөгч багийнхаа хаалганд гоол оруулж чадаагүй гэсэн тааруу үзүүлэлтээ зогсоов. Тоглолтын 53 дахь минутад Н.Наранболд, 31 дэх минутад Г.Гантогтох нар гоол оруулсан бөгөөд гоолын дамжуулалтыг багийн ахлагч Х.Цэнд-Аюуш өгчээ. Тоглолтын дараа довтлогч Н.Наранболд “Сүүлийн хоёр, гурван жилийн хугацаанд шигшээ багт тоглож, тус дэм болж чадаагүйдээ дотроо маш их бухимдалтай явсан. Энэ гоолыг би олон жил хүлээлээ. Энэ удаа шигшээ багтаа дуудагдаад үзэгчдийн хүсэж байсан гоолын цангааг гаргасандаа маш их баярлаж байна. Ялалт, ялагдал бүхэнтэй хамт байдаг Монголын үнэнч хөгжөөн дэмжигч нартаа баярлалаа” гэжээ. Монголын шигшээ баг дараагийн тоглолтоо Азийн аварга шалгаруулах тэмцээний урьдчилсан шатны плей-оффт Зүүн Тимортой хийх аж.
Г.Дорждагва
Эх сурвалж: Монголын үнэн сонин №023/24602/
°C
Сэтгэгдэл (0)
Сэтгэгдэл бичигдээгүй байна