​ П.Мөнхбаяр: Энэ онд 10 мянган өрхөд 1.25 их наяд төгрөгийн ипотекийн зээл олгоно

Монголбанкны Санхүүгийн зах зээлийн газрын Зах зээлийн хэлтсийн захирал П.Мөнхбаяраас зарим зүйлийг тодрууллаа. 

-Энэ онд ипотекийн зээлд хэчнээн төгрөгийн санхүүжилт  төсөвлөсөн бэ? 
-Хөнгөлөлттэй хүүтэй ипотекийн зээлийн хөтөлбөрийн санхүүжилтийн ерөнхий гэрээний дагуу хөтөлбөрийг Монголбанкны эх үүсвэр болон банк өөрийн эх үүсвэрээр санхүүжүүлж байна. Ингэхдээ Монголбанк өөрийн эзэмшлийн ипотекийн зээлээр баталгаажсан бондын эргэн төлөлтөөр хөтөлбөрийг санхүүжүүлдэг. УИХ-ын 2024 оны дөрөвдүгээр сарын 19-ний өдрийн нэгдсэн чуулганаар Үндэсний баялгийн сангийн тухай хуулийг баталж, орон сууцны хөнгөлөлттэй зээлийн хөтөлбөрийг Баялгийн сангаас нэмж санхүүжүүлэхээр шийдвэрлэсэн. 
Энэ онд нийт хөтөлбөрийн хүрээнд 1.25 их наяд төгрөгийн зээлийг 10 мянган өрхөд олгохоор тооцоод байна. Энэ нь сүүлийн зургаан жилийн дунджаас хоёр дахин өссөн үзүүлэлттэй байна.
-Ипотекийн зээлийг арил­жааны банкууд олгохдоо тухайн хүнд насны хязгаар зааж байна уу. Дунджаар хэдэн насныхан ипотекийн зээлд түлхүү хамраг­даж байна вэ?
-Монголбанкны ерөнхийлөгчийн 2016 оны аравдугаар сарын 25-ны өдрийн А-295 дугаар тушаалаар баталсан “Орон сууцны ипотекийн санхүүжилтийн журам”-ын дагуу хөтөлбөрийн зээлийг санхүүжүүлж байна. Тус журамд зээл хүсэгчид тавигдах шаардлагад насны хязгаар заагаагүй. Банкууд зээл хүсэгчийн өр, орлогын харьцаа болон бусад журамд заасан шаардлагуудад үндэслэн зээл олгоно. 
Хөтөлбөрийн хүрээнд олгосон зээлийн 50 хувийг 25-35 нас, 32 хувийг 35-45 насны бүлэг эзэлдэг. 
-Ипотекийн зээлийн хүү өндөр байна гэж шүүмжилж байна. Зээлийн хүүг багасгах талаар банкуудтай ярилцаж байна уу?
-Хөтөлбөрийн зээлийн хүү жилийн зургаан хувь байгаа. Энэ нь  бусад арилжааны нөхцөлтэй ипотекийн зээлийн хүүнээс 2.4 дахин бага байна. 
-Гэр хорооллын иргэдийн хэдэн хувь нь орон сууцад хамрагдаж байна вэ. Судалгаа бий юү?
-Хөтөлбөрийн хүрээнд орон сууцад хамрагдсан өрхийн 38 хувь нь гэр хорооллоос орон сууцад шилжин суурьшсан өрх байна. 
-УИХ-ын сонгуулийн дараагаар ипотекийн зээл олголт зогслоо гэж олон нийт шүүмжиллээ. Үүнд тайлбар өгөхгүй юү?
-Хөтөлбөрийн зээл олголт Улаанбаатар хот болон орон нутагт хэвийн үргэлжилж байна. 2024 оны долдугаар сарын 1-ний байдлаар 186 орчим тэрбум төгрөгийн зээлийг 1.6 мянган зээлдэгчид олгосон байна.

Н.Энхлэн

Эх сурвалж: Монголын үнэн сонин №029/24608/