Дүрслэх урлагийн ертөнцийн шинэ үзэгдэл

АНЭУ-ын нийслэл Дубай хотод “Modern Mongolia culture and business Middle East excellents awards” уран зургийн үзэсгэлэн амжилттай болж өндөрлөлөө. Монгол Улсын Гадаад харилцааны яамны дэмжлэгтэйгээр манай уран бүтээлчид үзэсгэлэнд оролцсон бөгөөд монгол, араб, энэтхэг  зураач Гран-При шагналын эзэн болов. Дорнодын авьяастнуудаас ийнхүү монгол зураачийг онцолсон явдал түүний дүрслэх урлагийн салбарт оруулж буй хувь нэмэр болох  инновацтай холбоотой болохыг  тэмдэглэжээ. Үзэсгэлэнд оролцсон монгол уран бүтээлчдийг Монгол Улсаас Саудын Арабын Хаант Улсад суугаа Элчин сайд Ш.Одонбаатар хүлээн авч уулзан баяр хүргэсэн байна.

Монголын урчуудын эвлэлийн гишүүн зураач, Соёлын тэргүүний ажилтан Э.Цолмонбат байгаль дэлхийн үзэсгэлэнт байдлыг түлхүү дүрсэлдэг. 
Нарны гэрлийн тусгалаар хувиран өөрчлөгддөг эх дэлхийн гоо үзэсгэлэнг бийрээр дүрслэх “амттай” ажилд  шунан дурладаг нэгэн. Илэрхийллээ бүрэн дүүрэн гаргахын тулд тэрбээр судалбар зургийн аянд морддог. Францын алдарт зураач Клод Монегийн амьдарч асан Живерне тосгон, өмнө зүгийн Монпелье хотуудаар аялж, уран бүтээлийн сангаа арвижуулжээ.  2022 оны тавдугаар сард ХБНГУ-ын Дюсельдорф хотноо жил бүр зохион байгуулдаг "Норд–Арт" үзэсгэлэнд томоохон хэмжээний зургаан бүтээл толилуулан, өнгө будаг, зурах арга барилаар ялгаран олны анхаарлыг татаж амжилттай оролцсон удаатай. Э.Цолмонбат Монгол орны говь, хангай, хээрийн бүсийн онцлогт тохируулан аялалдаа бэлдэж, 33 говийн судалгаа, 33 хөхий, сарьдаг өндөр хайрхныг зурахаар төлөвлөжээ. Монгол орон болоод Европын орнууд, Австри, Герман, Франц улсаар аялан тэмдэглэл хийж, бүтээлүүдээ зурсан байна. БНФУ-ын продюсер, уран зураач, куратор Харри Роүзмэн зураачийн уран зургуудын талаар “Зураач Э.Цолмонбатын бүтээлүүд импрессионист урсгал чиглэлд өөрийн хурц өнгө, хүчтэй бичлэгээр шинэ үзэгдэл болж байна. Түүнээс илэрч буй энэ хүч хаанаас өгөгдөж байгааг судлахад цаг хугацаа хэрэгтэй. Изм болгонд гүйцэтгэл сайтай зурдаг зураачийг анх удаа олж харлаа” хэмээн сэтгэгдлээ илэрхийлсэн явдал түүнийг уран зургийн ертөнцийн нэн сонирхолтой судлагдахуун болсныг илтгэх биз ээ.
Уран зурагт шинэ технологиудыг туршиж, өнгө тус бүрийн шинж чанар, сэтгэлгээнд нөлөөлөх хүчийг судалж уран бүтээлдээ тусгадаг тухайгаа тэрбээр яриандаа дурдсан байдаг юм.  

 Н.Энхцэцэг

Эх сурвалж: Монголын үнэн сонин №009, 010/24636, 24637/