Монголын шигшээ гурав дахь ялалтаа байгууллаа

Б.Зул

Монгол Улсын нийслэл Улаанбаатар хотноо болж буй 2025 оны Азийн аваргын урьдчилсан шатны “D” хэсгийн тоглолтууд өнөөдөр өндөрлөнө.  Өчигдөр буюу тэмцээний дөрөв дэх өдөр талбайн эзэн Монголын баг Вьетнамын шигшээгийн эсрэг тоглолоо. Манай залуусын хувьд уг тоглолтод зайлшгүй хожих ёстой байсан юм. Хэсгээс гурван баг гарах тул тэргүүлэгч Тайландын араас хоцролгүй нэхэхийн тулд хэн хэн нь ялах шаардлагатай байв. Вьетнамчууд эхний тоглолтдоо Таитиг 84:41-ээр ялсан. Дараа нь Тайландын шигшээд 55:81-ээр ялагдсан билээ. Манай багийн хувьд хүчтэй өрсөлдөгч Тайландтай тоглохын өмнө Вьетнамыг ялж, хэсгийн хоёрдугаар байраа баталгаатай болгох нь нутгийн эзний үүрэг байлаа. Энэ үүргээ тэд хангалттай биелүүлж гурав дахь ялалтаа байгуулснаар хэсэгтээ нэг ч хожигдолгүй Тайландтай нүүр тулах болов. Гэхдээ монголчуудын зам дардан байсангүй. Шигшээ багийг дөнгөж зарласны маргааш гол Э.Дөлгөөн гартаа хүнд гэмтэл авсан бол хоёр дахь тоглолтын үеэр холбон тоглогч О.Сэргэлэн хуруугаа хугалсан. Ингээд 10 тоглогчтойгоор талбайд гарах даалгавартай болсон юм. 

Хашир мастер О.Сэргэлэнг Вьетнамын эсрэг тоглолтод М.Өлзий-Орших орлохоор боллоо. Тэр тоглолтын эхний оноог алсын зайнаас шидэж авсан. Энэ нь ч түүнийг энэ тоглолтын баатар болох эхлэл байжээ гэлтэй. Гэхдээ эхний үед манай баг тааруухан тоглосон.

 Харин хоёрдугаар үед манай алдаа багасаж, Т.Санчир, Б.Билгүүн, М.Өлзий-Орших нарын зүтгэлийн ачаар оноог хоёр ч удаа тэнцүүлсэн. Тоглолт орж эхэлсэн тул хоёрдугаар үеийг манайх 46:45-аар илүүрхэн төгсгөсөн юм. Гуравдугаар үеийг манайх эрч хүчтэй эхлүүлсэн. Вьетнамаас 66 дугаартай Нгуен алдаагүй оноо авч байсан бол манайхан бүгд жигдхэн байлаа. Улмаар манай шигшээ тоглолтыг хянаж, гартаа авснаар энэ үеийг 63:57-гоор дуусгалаа. 

Шийдвэрлэх дөрөвдүгээр үед Монголын шигшээ алдаа маш бага тоглосон. Үзэгчдийн дэмжлэг тамирчдыг хөөргөж, ээлж дараалан, таслалт, хаалт, оновчтой дамжуулалт, шидэлт гүйцэтгэсээр арван оноогоор тасарч эхэллээ. Харин Вьетнамын шигшээ сандарч чарч, холоос хамаагүй шидэж эхэлсэн. Ихэнх нь байндаа тусахгүй байсан тул манай баг сөрөг довтолгоогоор оноо түүнэ. Тоглолт дуусахад хоёр минут дутуу байхад хурдан довтолгооноос Билгүүн тохсоноор үзэгчдийн цөсийг хөөргөж, ялалт манай талд болсныг албан ёсоор зарласан юм. Ийнхүү манай шигшээ тун хариуцлагатай тоглолтод 88:77-гоор ялалт авлаа.

 Тус тоглолтод манай баг тун жигдхэн тоглосон бөгөөд А.Энхбаясгалан 17 оноо, зургаан самбараар багаа тэргүүлжээ.  М.Өлзий-Орших бөмбөг барилт, салгалт, дамжуулалт, мэдрэмж тун сайн байсныг онцлох хэрэгтэй. Өнөөдөр Монголын шигшээ хэсгийг тэргүүлэгч Тайландын багтай “тулалдана”. Тайландын шигшээ тун сайн баг гэдэг нь харагдсан ч тоглолт Улаанбаатарт, манай нийслэлд болж байгаа билээ. Ийм хүнд тоглолтод л хөгжөөн дэмжигчдийн үүрэг их. “Уран ган” ордондоо очиж, багаа дэмжихийг уриалж байна.