Л.Энхрийлэнгийн медалийг гурван өрөө байраар мялаалаа

Узбекстаны Ташкент хотноо болсон жүдо бөхийн насанд хүрэгчдийн дэлхийн аварга шалгаруулах тэмцээнээс монголчууд алт, мөнгө, хүрэл медальтай эх орондоо ирсэн. Тэгвэл эмэгтэйчүүдээс цорын ганц медалийг хүртсэн олон улсын хэмжээний мастер Л.Энхрийлэнгийн амжилтыг “Блю Драгон” компаниас “Арт Сити” хотхонд гурван өрөө байраар мялаалаа. Тус байрны батламжийг өнөөдөр “Блю Драгон” компанийн захирал Б.Батжаргал, Б.Энхжаргал нар гардуулж өгөв. Үүнээс гадна тус компаниас олон улсын хэмжээний мастер Л.Энхрийлэнтэй 2024 оны Парисын олимпыг дуустал гэрээ байгуулсан бөгөөд гэрээний хүрээнд тэмцээн уралдааны зардалд тус болох юм. Ийнхүү Л.Энхрийлэн “Блю Драгон”-ы тамирчин болж байна. 

Түүний хувьд Сэлэнгэ аймгийн харьяат бөгөөд тус аймгаас жүдо бөхийн төрлөөр дэлхийн аваргаас медаль хүртсэн анхны тамирчин юм. Гурван өрөө байрны батламж гардуулж, хамтран ажиллах гэрээ байгуулах үеэр олон улсын хэмжээний мастер Л.Энхрийлэн сэтгэгдлээ хуваалцахдаа “Батжаргал ах, Энхжаргал эгч болон “Блю Драгон ХХК”-ны хамт олон, Сэлэнгэ аймгийн Засаг дарга Н.Лхагвадорж нартаа талархал илэрхийлье. Та бүхнийхээ итгэл, сэтгэлийг их амжилтаар эргэн хариу барихаа амлаж байна. Дэлхийн дэвжээнд хамтдаа тод гялалзах од нь байж компанийхаа нэрийг өндөрт өргөж Монголын анхны эмэгтэй олимпын аварга болохын төлөө хөдөлмөрлөнө. Маш их баярлалаа” гэв. 

Б.Зул