Халуун кофетой “Өглөөний галт тэрэг”

Англи, италичуудын амьдралын хэв маяг болсон  кофены соёл Монголд өргөн дэлгэрч байна. Сүүлийн үед явуулын,  сэдэвчилсэн кофе шопууд хөгжиж, борголд дурлагчдад үйлчилж байгаа билээ. Үүний нэг төлөөлөл бол  “Өглөөний галт тэрэг” кофе шоп юм. Анх 2022 онд О.Энхбаяр гэх залуу, гэр бүлийн хүнийхээ хамт суурин кофе шоп нээж байжээ. Гэвч түрээс, ус, цахилгааны төлбөр гэх мэт урсгал зардлын мөнгө өндөр гарч байсны улмаас үйл ажиллагаагаа зогсоожээ. Дахин шинэ өнгө төрхөөр эргэн ирсэн нь “Өглөөний галт тэрэг” нэртэй сэдэвчилсэн явуулын жижигхэн кофе шоп юм. Хоолны машин шиг хүнд оврынх биш учраас хаана ч очиж халуун кофегоор үйлчлэхэд тохиромжтой ажээ. Явуулынх гэдэг утгаараа хүн хаана байна тэнд очиж үйлчлэх боломжтой. Мөн суурин кофе шоп шиг өдөр тутмын зардал гардаггүй гэнэ. 

Итали кофены амт

Аливаа кофе шопын нэрийн хуудас бол амт байдаг гэдгийг хүн бүр мэднэ. Тэгвэл  “Өглөөний галт тэрэг”  кофе шоп, амт чанарын шалгарлаараа Европтоо эхний гуравт багтдаг Италийн “Essse” брэндийн кофены амтаар олон үнэнч үйлчлүүлэгчидтэй болжээ. Энэ кофены брэндтэй албан ёсоор хамтран ажилладаг. Кофены үрээ каргогоор авахаас зайлсхийдэг. Учир нь, кофены амт чанар, ялангуяа кофены үрэнд нөлөөлдгөөс гадна стандартад нийцдэггүй ажээ. Тиймээс хамтран ажилладаг  “Essse” брэндээс чингэлгээр, стандартын дагуу тээврээр авчруулдаг юм байна. Кофены амт олон төрлийн хольцгүй. Кофены үрээ агаараар шарсан учраас их уусан ч цээж хорсгодоггүй нь тэдний кофены онцлог юм. Суурь кофе буюу эспрессогоор дагнан, дахин давтагдашгүй нэг л амтыг гаргадгаараа  солонгос, америк  кофеноос ялгардаг ажээ. 
Халуун шоколад ууж зогсохдоо, тэднийхээр үйлчлүүлж буй хүмүүсийг ажиглалаа. Олонх нь тэдний кофены үнэ болон амтанд маш сэтгэл хангалуун байсан. “Өглөөний мэнд, авдгаасаа авъя” гэж хэлэх хүмүүсийг харвал үнэнч үйлчлүүлэгч нар гэдэг нь илт байлаа. 
 
Үйлчлүүлэгчдэдээ хамгийн ойр кофе шоп

Улирал, цаг хугацаа, нөхцөл байдлаас хамаарч, байршил болон цагийн хуваарьтаа өөрчлөлт оруулдаг гэнэ. Цэцэрлэг сургуулийн үйл ажиллагаа эхлэх хүртэл “Баянбулаг” автобусны буудал дээр байрлаж,  өглөө 6:30-10:30 хүртэл ажиллах төлөвлөгөөтэй байгаагаа хуваалцлаа. Баянбулагт байрлаж буй нь хэд хэдэн шалтгаантай гэв. Юун түрүүнд тэдний  зуслангийн байшинтай  ойрхон байдаг. Төв рүүгээ чиглэлтэй  байрлал сарын нэг сая төгрөгний төлбөр төлөхийг шаарддагаас үүдэн, одоогоор Баянбулгын  байршлыг  сонгожээ. Ажиллах цагийн хуваарь нь тэдний зорилгын эх үндэс юм гэнэ шүү. Энэ талаараа  үүсгэн байгуулагч О.Энхбаяр ийн хүүрнэв. “Бидний хамгийн том зорилго бол хүмүүст хамгийн хэрэгтэй үед нь хүрч үйлчлэх. Монголд өглөө эрт ажилладаг кофе шоп, үйлчилгээний газар  ховор байдаг. Олон хүн өглөөний цайгаа ууж чадалгүй гэрээсээ гардаг. Тэр хэрэгцээг л нөхөхийг хүссэн. Тиймээс л өглөөний цагийг сонгож ажилладаг” гэв. Түүний энэ үгийг батлах гэсэн шиг 09:20 цагийг хүртэл тэднийхээс хүний хөл тасарсангүй. Ар араасаа цуварсаар л... Энэ цагийг хүртэл тэдний цэс халуун уух зүйлээр дүүрэн байсан. Өглөөгүүр хүмүүс  халуун кофе уудгийг анзаарсан гэж тайлбарлав. Би үнэхээр очсон цагаасаа мөстэй кофе буюу хүйтэн уух зүйл авсан хүн нэгийг ч хараагүй. Өдрөөр ажиллах шаардлага гарвал хүйтэн кофе шэйк, смүүтээ гаргадаг гэв. Энэ бүгдээс үзэхэд, үйлчлүүлэгчдээ нарийн сайн ажиглаж судалжээ. 
Төлөвлөсөн, зорьсон ажилдаа чин сэтгэлээсээ хандаж, үйлчлүүлэгчдээ халуун кофегоор дайлаад үддэг залуу гэр бүлд аз жаргал хүсээд сурвалжилгаа төгсгөе.

А.Даваадулам

Эх сурвалж: Монголын үнэн сонин №027/24558/