Малчдын зээлийн эргэн төлөлтийг ирэх зургадугаар сар хүртэл хойшлууллаа

Өвөлжилт, хаваржилт хүндэрсэнтэй  холбогдуулан малчдын арилжааны банкнаас авсан зээлийн эргэн төлөлтийг ирэх зургадугаар сарын 1 хүртэл түр хойшллуулаа. Үүсэн нөхцөл байдалтай холбогдуулан  Засгийн газраас орон даяар Өндөржүүлсэн бэлэн байдал зарлаж, сайд нараар ахлуулсан  зургаан баг орон нутагт ажиллаж байгаа юм. Сайд нарыг  орон нутагт ажиллах үеэр малчдын  зүгээс хамгийн их хөндсөн  санал, хүсэлт  нь  зээлийн асуудал байжээ.  Тиймээс  Засгийн газар, УОК-ын зүгээс Монголбанк болон арилжааны банкуудын удирдлагуудтай уулзаж, зудын гамшгийн эрсдэлийг бууруулахад банк санхүүгийн салбарынхны дэмжлэг, оролцоо чухал байгааг онцлоод хүнд цаг үед малчдаа дэмжин банкны зээл төлөлтийг нь хойшлуулах тал дээр хамтарч ажиллахыг хүссэн юм.  Монголбанкны ерөнхийлөгч Б.Лхагвасүрэн энэ үеэр  “Хөдөө аж ахуйн салбар 2023 онд уналттай гарсан учраас малчдын зээлийн эргэн төлөлтийг хойшлуулахтай холбоотой хүсэлт ирсээр байгаа. Энэ асуудалд Төв банкны зүгээс бодлогын дэмжлэг үзүүлэхэд бэлэн байгаа бөгөөд ямар зохицуулалт, дэмжлэгийг  хэрхэн шийдэх  тухайд хамтран ажиллахад бэлэн”  гэгээ илэрхийлсэн.  Монголбанкны мэдээллийн санд 140 мянга гаруй малчдын 1.2 их наяд төгрөгийн зээл бүртгэлтэй байдгаас 51.2 хувь буюу 618 тэрбум төгрөгийн зээлийг Төрийн банкнаас, 48.5 хувь буюу 585 тэрбум төгрөгийн зээлийг Хаан банкнаас тус тус олгосон байна. Хаан банкны хувьд өнгөрсөн оны арванхоёрдугаар сарын 1-нээс хойш хүсэлт өгсөн малчдын зээлийн эргэн төлөлтийг сунгаж эхэлсэн бөгөөд нэг жил хүртэлх хугацаагаар хойшлуулах боломжтойг  хэлсэн юм. Төрийн банкны хувьд эхний ээлжид энэ оны  зургадугаар сарын 1 хүртэл зээлийн эргэн төлөлтийг хойшлуулах боломжтойгоо энэ үеэр илэрхийлсэн. Ийнхүү  малчид харьяа орон нутгийнхаа Хаан банк болон Төрийн банкны салбарт хүсэлтээ цахимаар гаргаж, шийдүүлэх боломжтой юм байна. Мөн энэ үеэр “Үндэсний давхар даатгал” ХК-ийн зүгээс “Энэ оны 9-10 дугаар сарын хооронд малчдын даатгуулсан малын индексжүүлсэн даатгалын нөхөн төлбөрийг олгоно. Энэ оны  гуравдугаар улирал хүртэл малчдын зээл төлөлт хойшлогдвол тэр үеэр бид даатгалын нөхөн төлбөр олгож таарах учраас  эргээд малчид банкны зээл төлөлтөө хийхээр илүү дөхөм болно” гэлээ. Уулзалтын төгсгөлд Шадар сайд С.Амарсайхан Монголын нийгэм, эдийн засагт голлох үүрэгтэй мал аж ахуйн салбарыг дэмжиж, монгол түмний дангааршил, ондоошлын эх үндэс болсон уламжлалт өв соёл, зан заншлыг тээгч малчин түмнээ ойлгож, малчдын зээлийн эргэн төлөлтийг хойшлуулах талаар нэгдмэл байр суурьтай байж, зөвшилцөлд хүрсэн банк санхүүгийн салбарынханд талархлаа илэрхийлэв.

 М.Өлзий

Эх сурвалж: Монголын үнэн сонин №007/24586/