МАН Монгол Улсын өнцөг булан бүрд хүрч ажиллалаа

Монгол Ардын Нам 30 дахь Их хурлаас хойш 21 аймаг, 330 сум, зургаан тосгон, хоёр өртөө, нийслэлийн есөн дүүрэг, 204 хорооны давхардсан тоогоор намын нийт 107500 гишүүн дэмжигчид, иргэддээ хүрч ажиллалаа.

Энэ хүрээнд намын анхан, дунд шатны байгууллагуудын үйл ажиллагааг сайжруулах, идэвхжүүлэх, намын гишүүд, дэмжигчдээ чадавхжуулах, мэдлэг ур чадварыг нь нэмэгдүүлэх, санал сэтгэгдлийг нь сонсох зорилгоор сургалт, судалгаа, уулзалт, хэлэлцүүлгүүдийг амжилттай зохион байгуулж байна.

Тухайлбал, “Шинэ зуун дэвшилтэт бодлого”, “Жендэрийн эрх тэгш байдлыг хангах нь”, “Бага хурлын гишүүдийн уулзалт, хэлэлцүүлэг”, “Өглөөний уулзалт” зэрэг намын гишүүн дэмжигчид, иргэд рүү чиглэсэн олон удаагийн уулзалт хэлэлцүүлэг, Социал демократ Монголын эмэгтэйчүүдийн холбоо, Социал демократ Монголын залуучуудын холбоод Бүсийн чуулган, Стратеги академи, Дэвшилтэт бодлогын хүрээлэн, Хүний эрх, дэвшилтэт бодлогын хүрээлэн зэрэг намын дэргэдэх байгууллагууд өөрсдийн чиглэлийн хүрээнд сургалт, уулзалт, хурал, семинар, нөлөөллийн ажлуудыг тус тус зохион байгуулсан.

“Нээлттэй нам” намын гишүүн дэмжигчдийн уулзалт хэлэлцүүлгийг 2023 оны зургаагаас арванхоёрдугаар сарын хооронд 21 аймаг, 324 сум, гурван тосгонд 31000 гаруй намын гишүүн дэмжигчид, иргэдийн дунд зохион байгуулж, Монгол Улсын Их Хурлын 2020 оны сонгуульд Монгол Ардын Намаас дэвшүүлсэн мөрийн хөтөлбөрийн биелэлт, Засгийн газрын үйл ажиллагааны хөтөлбөрийн хэрэгжилт, үр дүн болон УИХ-аас батлан гаргасан хууль тогтоомжуудын талаар мэдээлэл өгч, Монгол Улсын Их Хурлын 2024 оны сонгуульд Монгол Ардын Намаас дэвшүүлэх мөрийн хөтөлбөрийн төсөлд санал авч, намын гишүүдийн цахим бүртгэлийн системийн мэдээллийг шинэчилсэн байна. Түүнчлэн гадаад харилцааны хүрээнд Германы Социал демократ нам, Их Британи Умард Ирландын Нэгдсэн Хаант Улсын Хөдөлмөрийн нам, Испанийн Хаант Улсын Хөдөлмөрчдийн намуудтай харилцан ойлголцлын санамж бичиг байгуулж, Азийн Улс төрийн намуудын олон улсын Бага хурлын Залуучуудын зургаа, Эмэгтэйчүүдийн долдугаар Бага хурлыг Улаанбаатар хотноо амжилттай зохион байгууллаа.

Зөвхөн 2023 онд намын анхан, дунд шатны байгууллагуудын үйл ажиллагааг сайжруулах, идэвхжүүлэх, намын гишүүдийг чадавхжуулах, мэдлэг ур чадварыг  нь нэмэгдүүлэх зорилгоор 631 уулзалт, арга хэмжээг зохион байгуулжээ.

 Эх сурвалж: "Монголын үнэн" сонин №008/24587/