Нийслэлийн Засаг дарга бөгөөд Улаанбаатар хотын Захирагч Х.Нямбаатар Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррэтаг хүлээн авч уулзлаа. Уулзалтын үеэр талууд хамтын ажиллагааны талаар санал солилцов. Жованна Пиккаррэта нь энэ оны хоёрдугаар сард Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайдаар томилогдсон юм.
Монгол Улс Бүгд Найрамдах Итали Улстай 1970 онд дипломат харилцаа тогтоосон. Хамтын ажиллагааны хүрээнд УБЗАА-наас Итали Улсын Үндэсний судалгааны зөвлөлтэй хамтран Улаанбаатар хотын хог хаягдлыг бууруулах, дахин ашиглах, дахин боловсруулах гэсэн гурван дадлыг төлөвшүүлж, хог хаягдлын тогтвортой менежментийг хангах зорилго бүхий “3R4UB” төслийг хэрэгжүүлж ирсэн. Тус төслийг цаашид эрчимжүүлэхэд анхаарна гэдгийг Хотын дарга Х.Нямбаатар уулзалтын үеэр онцлов.
Түүнчлэн Улаанбаатар хотын замын хөдөлгөөний түгжрэлийг бууруулахад хамтран ажиллах боломжтой гэдгийг Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррэта хэллээ. Энэ чиглэлд хамтран ажиллах боломжийн талаар судалж, дахин уулзахад бэлэн гэдгээ Хотын дарга мөн илэрхийлсэн юм.
Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
°C
Сэтгэгдэл (0)
Сэтгэгдэл бичигдээгүй байна