Айлын гэр, малын саравч шар усны үерт автжээ

 Өвөрхангай аймаг, Хархорин сумын  Онгоцон-Ухаа багийн “1 дүгээр тасаг” гэдэг газар  нэг  өрхийн гэр, малын саравч шар усны үерт автжээ. Тус аймгийн Онцгой байдлын албан хаагчид малчин Г-ын 5 ханатай гэр, 20х8 метрийн хэмжээтэй малын саравч усанд автаж байсныг  70 метрийн урт далан байгуулж аюулгүй болгожээ. 

Мөн Сэлэнгэ аймаг, Сайхан сумын  Гавшгай багт авто засварын газрын хашаа шар усны үерт автсан байна.  Тус аймгийн Онцгой байдлын албаныхан  иргэн С-ийн авто засварын газрын хашаанд үерийн ус орсон байсныг  1 метр өндөр, 3.5 метр өргөн, 200 метрийн урт далан байгуулж аюулгүй болгосон байна. 

Түүнчлэн  Улаанбаатар хот, Сонгинохайрхан дүүрэг дэх Баянхошуу дөрөвдүгээр гудамжинд 1 өрхийн байшин шар усны үерт автсан, гарах боломжгүй болжээ.  Онцгой байдлын алба хаагчид  4х6 метрийн хэмжээтэй байшингийн 2х3 метрийн хэмжээтэй үүдний амбаарт их хэмжээний ус орсон байсныг  5 тн ус соруулж гаргажээ. 

Иймд Онцгой байдлын газраас шар усны үеэр урьдчилан сэрэмжүүлж байна. 

Э.Сонор