380 малчин өрх 100 хувь малгүй болжээ

УОК-оос хаваржилтын нөхцөл байдлын талаар мэдээлэл хийв. 

Өнөөдрийн байдлаар зургаан аймгийн 20 суманд цагаан зудтай байна. Эдгээр суманд 12.5  мянган малчин өрх, 5.2 сая толгой мал хаваржиж байна. 

Арав хоногт нэг удаа хийдэг хээрийн цасны хэмжилтийн мэдээгээр гуравдугаар сарын 20-ны байдлаар нийт нутгийн 50 гаруй хувьд цастай байна.

 Үүнээс  Алтай, Хангай, Хэнтий, Хөвсгөлийн уулархаг нутаг, Увс нуур, Дархадын хотгор, Хан Хөхийн нуруу, Дарьгангын тэгш өндөрлөг, Монголын Дорнод талаар 10-42 см, бусад нутагт 1-9 см, хунгарлаж шуурсан газартаа 60 см, гуу жалгандаа 80 см хүртэл зузаан цастай.

Улсын хэмжээнд нийтдээ 5.2 сая толгой мал хорогджээ. Сүхбаатар, Хэнтий, Төв, Дундговь аймагт малын хорогдлын тоо өндөр байна.  Улсын хэмжээнд 2700 малчин  өрх нийт малынхаа 70-аас дээш хувийг хорогдуулсан дүнтэй байна. Мөн 380 малчин өрх 100 хувь малгүй болсон гэсэн тоо мэдээлэлтэй байна.

Э.Сонор