Иргэн Г.Ган-Очирын ХААН банкны дансанд сонгуулийн санал тоолох хар машины луйвартай холбоотой есөн их наяд төгрөг шилжүүлсэн гэх мэдээлэл нийгмийн сүлжээнд шуугиан тариад байгаа юм. Хэн, хаанаас шилжүүлэв, үнэн үү, худал уу гэсэн эргэлзээ олны дунд үүсгэв. Үүнтэй холбоотой ХААН банкны гүйцэтгэх захирал Р.Мөнхтуяа тайлбар хийлээ. Тэрбээр:
-Өнөөдөр ХААН банк дансандаа дөрвөн их наяд төгрөгтэй байна. Тиймээс нэг харилцагч дээр ийм их хэмжээний гүйлгээ гарах боломжгүй юм.
Бид Банкны тухай хуулийн дагуу актив хөрөнгө, зээл, нийт татан төвлөрүүлсэн хөрөнгө, ашигт ажиллагаа, орлогын тайланг улирал тутам олон нийтэд тайлагнадаг хэмээн мэдээлэв. ХААН банкны гүйцэтгэх захирал Р.Мөнхтуяа мэдээлэл хийснийхээ дараа сэтгүүлчдийн асуултад хариулав.
-Ямар нөхцөлд их хэмжээний мөнгийг хянах боломжтой вэ?
-Барилт хийгдсэн дансанд зарлагын гүйлгээг нь хянах зорилгоор хийнэ. Боломжит гүйлгээнээс дээш мөнгө орохгүй гэсэн үг.
-Барилт хийсэн гэхээр их хэмжээний мөнгө орсон гэсэн үг үү?
-Тухайн иргэний дансанд мөнгө оруулахгүй, мөн гаргахгүй. Компьютерийн тоног төхөөрөмждөө мөнгө орох, гарах дээд хязгаараар програмаа тохируулсан байдаг.
-Их наяд төгрөг хүртэл хэмжээний мөнгө шилжүүлэх боломжтой юу?
-20 сая хүртэл төгрөгийн гүйлгээ Монгол банк болон Санхүүгийн төвд бүх гүйлгээг тайлагнадаг.
-Иргэн Г.Ган-Очирын дансанд байгаа их хэмжээний мөнгө хуурамч данс уу?
-Хасах тэмдэгтэй гэдэг нь гүйлгээ хийх боломжгүй гэсэн мэдээлэл. Ямар ч байсан манай банкин дахь иргэн Г.Ган-Очирын дансанд тийм хэмжээний мөнгө байхгүй, орлого зарлага хийгдээгүй.
-Хэрэглэгчийн нууцлалын мэдээллийн аюулгүй байдал хэр хангагдсан бол?
-Хэрэглэгчийн мэдээллийн аюулгүй байдалтай холбоотой асуудалд манай банк байнга анхаардаг. Олон улсын түвшиний таван аудитоор жил бүр аудит хийлгэдэг. Мэдээллийн аюулгүй байдлын стандарт мөрддөг. Стандартаа олон улсын байгууллагаар хяналт хийлгэдэг. Хэрэглэж байгаа бүх апплейкэшн, системдээ жилд хоёр удаа шалгалт хийлгэж байдаг.
Н.Энх
°C