МАН, СДМЭХ 21 аймаг, нийслэлд ажиллаж, амьдарч байгаа эмэгтэйчүүдээ сургаж, бэлтгэх, чадавхжуулах зорилгоор
НҮБ-ын Хөгжлийн хөтөлбөртэй хамтран “Манлайлагч 350” хөтөлбөрийг энэ сарын 3-наас
хэрэгжүүлсэн билээ. Хөтөлбөрт одоогийн байдлаар манлайлагч 200 гаруй эмэгтэйг хамруулаад
байна. Хөтөлбөрийн дөрөвдүгээр ээлжийн сургалт
эхэлж, Дорнод, Өмнөговь, Сүхбаатар, Хэнтий
аймаг болон Хан-Уул, Чингэлтэй, Сүхбаатар дүүргийн 60 манлайлагч эмэгтэйг хамруулж
байгаа юм.
Энэ удаагийн сургалтыг нээж МАН-ын нарийн бичгийн дарга Н.Энхбаатар “МАН энэ жилийн үйл ажиллагааныхаа хөтөлбөрийн тэргүүнд жендэрийн тэгш эрхийг тодорхойлсон. Өнөөдөр бид жендэрийн тэгш эрхийн тухай ярихын тулд хаана хаанаа хандлагаа өөрчлөх ёстой. Бүгдийг эрчүүд чадна гэхээсээ илүүтэй эмэгтэйчүүд “Бид чадна. Бидэнд давуу талууд бий” гэдгийг харуулах ёстой. Эмэгтэйчүүд та бүхэн өөрсдийгөө байгаагаасаа илүү үнэлэх ёстой. Нийгмийн манлайлагч болсон та бүхэн чадна” гэдгийг онцоллоо.
МАН-ын “Шинэ зуун Дэвшилтэт бодлого” хөтөлбөрт “Жендэрийн эрх тэгш байдлыг хангасан бодлого, эрх зүйн орчин, соёлыг бүрэн төлөвшүүлнэ” гэж заасан. Энэ зорилтдоо хүрэхийн тулд улс төрийн намуудаас анхлан жендэрийн эрх тэгш байдлыг хангахад баримтлах бодлогын бичиг баримтыг боловсруулан хэрэгжүүлж байна. Өнөөдөр Монголын эмэгтэйчүүд шийдвэр гаргах түвшинд хүрч ажиллахад санхүүжилтийн эх үүсвэр хангалтгүй, цалин хөлс бага, тэгш бус халамж, асаргааны үүрэг хүлээдэг, дэмжлэггүй хууль эрх зүйн орчин, давхар стандарт болон жендэрт суурилсан хэвшмэл ойлголт нь эмэгтэйчүүдийн оролцоог багасгах, тэгш боломжийг бүрдүүлэхгүй байх үндсэн нөхцөл болдог.
Эмэгтэйчүүдийн ёс зүйн манлайлал, Жендэрийн үндсэн ойлголт, Хүний эрх, Социал демократ үзэл санаа, Эв санааны нэгдэл, шийдвэр гаргах түвшний эмэгтэйчүүдийн онцлог сэдвийн хүрээнд сургалт зохион байгуулжээ.
НҮБ, МУИС, Удирдлагын академи, Хүний эрхийн дэвшилтэт бодлогын хүрээлэнгийн эрдэмтэн, доктор, судлаачид сургалтыг удирдан явуулж байна.
Н.Энхлэн
Эх сурвалж: Монголын үнэн сонин №014/24545/
°C
Сэтгэгдэл (0)
Сэтгэгдэл бичигдээгүй байна