​ Зүрх асна

Монгол Улсын Гавьяат жүжигчин Төмөрийн Ариунаа урлагийн тайзнаа мэндэлсэн 40 жилийн ойн “Зүрх асна” тоглолтын хэвлэлийн бага хурал Шангри-Ла зочид буудлын их танхимд болж өндөрлөлөө. Соёл, урлагийн салбарын бүхий л төлөөлөл, хэвлэл мэдээллийн ажилтнуудын бүрэлдэхүүнтэй зохион байгуулсан уг үйл ажиллагаа нь хэвлэлийн хурал гэхээсээ түүнд амжилт ерөөсөн, үе үеийн хамтрагчдын нэгдсэн чуулган байлаа. Танхимыг гурван хэсэг тохижуулж, зочид зураг авахуулах, үг хэлэх, ярилцлага өгөх талбарыг хангалттай шийджээ. Ассан улаан өнгө тайз, чимэглэлийн үндсэн код байв. Т.Ариунааг гал улаан өнгөгүйгээр хэрхэн төсөөлөх билээ. Дэлгэцэнд түүний амьдрал хөвөрч эхлэхэд зочид чимээгүйхэн, бахархал дүүрэн сонсож харагдана билээ.

Амьдралын минь алтан босго

Арван зургаан нас минь

Азтайхан баяртайхан

Арван зургаан хавар минь... Тэртээд одсон он жилүүд цангинасан сайхан хоолойгоор бүгдийн зүрх сэтгэлд дурсамж болон асав уу гэлтэй. Дуулсан дуу бүр нь хит болдог дуучин бүсгүйн баяр жаргал, зовлон гуниг, ололт амжилт, ялалтын чимээнд танхим нам жим. Зарим нь суучихсан, хэсэг нь ширээ тохойлдон, үе үе шүүрс алдсан, хөнгөн инээд цацруулсан, уулзалтын уухайн чимээтэй баярт өдөр. Эл өдөр хорвоогийн мөнх бусыг үзүүлсэн Урлагийн гавьяат зүтгэлтэн, “Инээмсэглэл” хамтлагийн гишүүн, продюсер, хөтлөгч, хөгжмийн зохиолч Б.Долгион агсныг дурссан гунигт өдөр. Урд өдөр нь утас цохиж урьсан эрхмээс эрхэм хүнтэйгээ эргэн хэзээ ч уулзахгүйгээ бодрох элэг эмтрэм агшнууд. Түүний гэгээн дурсгалыг хүндэтгэн бүгд нэгэн дор мэхийн ёсолсон хүндэтгэлт өдөр. Эрхэм хүмүүстээ “Нандин учрал”, “Анхны хайр” пянзаа гарын үсэг зурж дурсгасан билэгт өдөр.

Т.Ариунаа: “Намайг энэ хүртэл үгээр далавч хийж, аялгуугаар дэвэн хөөрч, өндрийн өндөрт нисгэж сонсогч олонд хүргэсэн илч, түлш бол ая зохиогч, үг зохиогч, хөгжмийн зохиолч, продюсер, бүжигчид, дуучид, тоглолтын найруулагч нар, загвар зохион бүтээгч, нүүр будагч гээд он жилүүдийн туршид, цаг үе болгонд сонгогдож ажилладаг уран бүтээл та нар билээ. Аль нэг нь үгүй болбоос угаас бүтээл төрөх боломжгүй. Тиймээс та нартаа баярлаж буйгаа хэлэхийг хүсэж байна. Хэдийгээр уран бүтээл төрлөө ч түүнийг өлгийдөн авч олон арван жил амьд оршоодог үзэгч, сонсогч, дэмжигчид үгүйсэн бол би дуулавч цуурай үгүй, бүживч биелгээ үгүй болох байсан. Та нартаа талархаж байна” гэлээ.

Н.Энхцэцэг

Эх сурвалж: "Монголын үнэн" сонины №015/24642/ дахь дугаарыг ЭНД-ээс уншаарай.